سلمان خورشید کو سدبھاؤنا ایوارڈ دیاجائے گا

حیدرآباد، 6 اکتوبر (یو این آئی)سابق وزیرخارجہ، کانگریس ورکنگ کمیٹی کے رکن اور سپریم کورٹ کے سرکردہ وکیل سلمان خورشید کو جاریہ سال سدبھاؤنا ایوارڈ دیاجائے گا۔
یہ ایوارڈ 35ویں راجیو گاندھی سدبھاؤنا یاترا یادگار دن کے موقع پر اتوار، 19 اکتوبر کو تاریخی چارمینار پر منعقد ہونے والے پروگرام میں پیش کیا جائے گا۔
قابل ذکر ہے کہ سابق وزیراعظم اور کانگریس کے سابق صدر راجیو گاندھی نے 19 اکتوبر 1990 کو اسی تاریخی چارمینار کے مقام پر کانگریس پارٹی کا جھنڈا لہرایا تھا اور سدبھاؤنا یاترا کا آغاز کیا تھا۔ اس دن کی یاد میں راجیو گاندھی سدبھاؤنا یاترا اسمارگ سمیتی کی جانب سے ہر سال چارمینار پر ایک تقریب منعقد کی جاتی ہے جس میں مختلف شعبوں میں نمایاں خدمات انجام دینے والی ممتاز شخصیت کو سدبھاؤنا ایوارڈ سے نوازا جاتا ہے ۔
صدرتلنگانہ کانگریس مہیش کمارگوڑ تقریب کے دوران کانگریس پارٹی کا جھنڈا لہرائیں گے ۔
تقریب میں مہمان خصوصی کے طور پر وزیراعلی ریونت ریڈی، نائب وزیراعلیٰ بھٹی وکرامارکا، اے آئی سی سی انچارج میناکشی نٹراجن اور وزیر آبپاشی اُتم کمار ریڈی شرکت کریں گے ۔