اشون کو بی بی ایل میں کھیلتے دیکھا جا سکتا ہے

نئی دہلی، 23 ستمبر (یو این آئی ) سابق ہندوستانی اسپنر آر اشون بگ بیش لیگ (بی بی ایل) میں کھیلنے والے پہلے مرد ہندوستانی کیپڈ کھلاڑی بن سکتے ہیں۔ بی بی ایل کے چار کلب آنے والے سیزن کے آخری مراحل کے لیے ان کی خدمات حاصل کرنے میں دلچسپی رکھتے ہیں۔ یہ ٹیمیں سڈنی تھنڈر، سڈنی سکسرز، ایڈیلیڈ اسٹرائیکرز اور ہوبارٹ ہریکینز ہیں جن میں تھنڈر اور ہریکینز اس دوڑ میں سرفہرست ہیں۔ معاہدے کو اس ہفتے کے آخر تک حتمی شکل دی جا سکتی ہے۔ ابھی تک کوئی ہندوستانی بین الاقوامی کھلاڑی بی بی ایل میں نہیں کھیلا ہے۔
بی سی سی آئی صرف ریٹائرڈ کھلاڑیوں کو بیرون ملک ٹی 20 لیگز میں کھیلنے کی اجازت دیتا ہے۔ اس سال کے شروع میں، دنیش کارتک ایس اے 20 میں پارل رائلز کے لیے کھیلے تھے۔ اس سے پہلے امباتی رائیڈو 2023 میں سی پی ایل میں سینٹ کٹس اینڈ نیوس پیٹریاٹس کے لیے اور پھر جنوری 2024 میں آئی ایل ٹی 20 میں ایم آئی ایمریٹس کے لیے کھیلے تھے۔ رابن اتھپا اور یوسف پٹھان اس سیزن میں دبئی کیپٹلز کا حصہ تھے۔ سریش رئنا دو سال قبل ابوظہبی ٹی 10 میں دکن گلیڈی ایٹرز کا حصہ تھے۔
اشون پہلے ہی متحدہ عرب امارات میں ہونے والی آئی ایل ٹی 20 نیلامی کا حصہ ہیں، جو اگلے منگل کو ہوگی۔ اگر انہیں خریدا جاتا ہے تو وہ 2 دسمبر سے 4 جنوری تک چلنے والا پورا آئی ایل ٹی 20 کھیلیں گے۔
بی بی ایل 14 دسمبر سے شروع ہو رہا ہے اور فائنل 20 اور 25 جنوری کے درمیان منعقد ہونے کی توقع ہے۔ اس کا مطلب ہے کہ اشون سیزن کے اختتام پر کسی ٹیم کے لیے تین یا چار میچوں کے لیے دستیاب ہوں گے اور اگر وہ ٹیم کوالیفائی کر لیتی ہے تو وہ فائنل میں بھی کھیل سکتے ہیں۔