راہل گاندھی نے دراندازوں کی حفاظت کے لیے "ووٹر ادھیکار یاترا” کی: شاہ

ڈہری آن سون، 18 ستمبر (یو این آئی) مرکزی وزیر داخلہ اور بھارتیہ جنتا پارٹی (بی جے پی) کے سینئر لیڈر امت شاہ نے جمعرات کو کہا کہ کانگریس لیڈر راہل گاندھی کی بہار میں "ووٹر ادھیکار یاترا” کے دوران اٹھایا گیا ووٹ چوری کا معاملہ عوام کی توجہ ہٹاکر ہندوستان میں رہنے والے بنگلہ دیش اور دیگر ممالک کے دراندازوں کو بچانے کی کوشش تھی۔
شاہ آباد اور مگدھ خطہ کے بی جے پی لیڈروں اور کارکنوں سے خطاب کرتے ہوئے مسٹر شاہ نے کہا کہ راہل گاندھی نے حال ہی میں اپنی "ووٹر ادھیکاریاترا” میں ووٹ چوری کا معاملہ اٹھایا تھا، لیکن حقیقت میں یہ غیر قانونی طور پر سرحد پار کرکے ہندوستان میں مقیم بنگلہ دیش اور دیگر ممالک کے دراندازوں کو بچانے کی ایک کوشش تھی۔
مسٹر شاہ نے کہا کہ ووٹ کی چوری ایک بہانہ ہے اور ہندوستان بالخصوص بہار کے لوگ اس بات کو برداشت نہیں کریں گے کہ حکومت کی طرف سے دی جارہی خدمات کا فائدہ اٹھانے والے دراندازاٹھائیں۔ انہوں نے کہا کہ حکومت نے ہم وطنوں کے لیے متعدد فلاحی اسکیمیں شروع کی ہیں، جن میں غریبوں کے لیے سالانہ زیادہ سے زیادہ 5 لاکھ روپے تک کا مفت علاج بھی شامل ہے ۔ بی جے پی لیڈر نے زور دے کر پوچھا کہ کیا یہ سہولیات دراندازوں کو بھی ملنی چاہیے ۔
مسٹر شاہ کے اس سوال پر اجلاس میں موجود سبھی نے ایک آواز میں نفی میں جواب دیا۔ اس کے بعد انہوں نے موجود لوگوں سے کہا کہ بہار میں ووٹر لسٹوں کے اسپیشل انٹینسیو ریویژن (ایس آئی آر) کے دوران کسی بھی اہل شخص نام ووٹر لسٹ سے حذف نہیں کیا گیا ہے ۔