قطر سے خاص تعلقات ہیں، اسرائیل محتاط رہے : ٹرمپ کا انتباہ

واشنگٹن، 15 ستمبر (یو این آئی) اسرائیل کے قطر پر حالیہ حملے کے بعد امریکی صدر ڈونلڈ ٹرمپ نے اسرائیل کو متنبہ کرتے ہوئے کہا ہے کہ قطر سے امریکہ کے خاص تعلقات ہیں، اسرائیل احتیاط کرے ۔
غیر ملکی ذرائع ابلاغ کے مطابق یروشلم پوسٹ کا کہنا نے امریکی صدر ڈونلڈ ٹرمپ نے اسرائیل پر واضح کردیا ہے کہ قطر نہ صرف امریکہ بلکہ خطے میں امن قائم کرنے کی کوششوں کا ایک اہم شراکت دار ہے ۔ انہوں نے کہا کہ حماس کے خلاف کارروائیاں اگرچہ ضروری ہیں لیکن اسرائیل کو چاہیے کہ سوچ سمجھ کر اور احتیاط سے قدم اٹھائے ، کیونکہ ایسے اقدامات امن عمل اور مشترکہ مفادات کو نقصان پہنچا سکتے ہیں۔
دوسری جانب عرب اسلامی وزرائے خارجہ مشاورتی اجلاس سے خطاب کرتے ہوئے قطری وزیراعظم نے اسرائیلی حملے کی شدید مذمت کی اور قطر کی خودمختاری کے دفاع کیلئے قانونی اقدامات پر زور دیا۔ [؟]انہوں نے کہا کہ اسرائیلی حملہ اقوام متحدہ چارٹر کی کھلی خلاف ورزی ہے بین الاقوامی برادری دہرا معیار ترک کرے اسرائیل کو جرائم پر جوابدہ ٹھہرانے کا وقت آچکا۔
وزیراعظم کا کہنا تھا کہ فلسطینی عوام کی جبری بیدخلی کی سازش کامیاب نہیں ہو گی اسرائیل کی نسل کش جنگ جھوٹے جواز کے باوجود ناکام ہو گی۔
انہوں نے مزید کہا کہ اسرائیل نے امن تجاویز مسترد کر کے جنگ کو مزید پھیلا دیا، خطے کی اقوام اور خود اسرائیلی عوام کو بھی سنگین خطرات لاحق ہیں۔