جموں/۱۲ستمبر
جموں کشمیر کے ضلع رام بن میں پولیس نے ایک قتل کیس کو ریکارڈ وقت میں حل کرکے ملزم کو گرفتار کیا۔
پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس اسٹیشن بانہال کو۸ستمبر کو۴بجے ایک اطلاع موصول ہوئی کہ قومی شاہرہ رتنبھال میں ایک کلورٹ کے نتیجے تین لاشیں پڑی ہوئی ہیں۔
ترجمان نے کہا کہ یہ اطلاع موصول ہونے پر بی این ایس ایکٹ کے دفعہ۱۰۳کے تحت ایک مقدمہ زیر ایف آئی آر نمبر۲۰۲۵/۹۵درج کیا گیا اور اس ضمن میں تحقیقات شروع کی گئی۔
ان کا کہنا تھا کہ ایس ڈی پی او بانہال اور ایس ایچ او بانہال کی قیادت میں پولیس ٹیمیں فوری طور پر موقع پر پہنچ گئیں، جائے وقوعہ کو محفوظ بنایا گیا، تفتیشی افسر فوٹوگرافر اور سینئر پولیس افسران کو بھی مطلع کیا۔
بیان میں کہا گیا’’سینئر افسران اور ایف ایس ایل ٹیم کی آمد پر، جرم کے منظر کا باریک بینی سے معائنہ کیا گیا اور احتیاط سے جانچ پڑتال کے بعد شواہد کو نشان زد کیا گیا، فوٹو گرافی کی گئی اور ان کی مناسب طور پر شاہدین کی موجودگی میں پیکج کی گئی‘‘۔
ترجمان نے کہا’’غیر شناخت شدہ لاشیں ایک خاتون (عمر تقریباً۳۰ سے ۳۲سال) ایک لڑکی (عمر۹سال) اور ایک لاش بچہ (عمر ۵سال) کی پائی گئیں جن کو غیر معمولی طور پر تشدد کا نشانہ بنایا گیا تھا اور ان کے گلے بھی کپڑے سے بندھے ہوئے تھے ‘‘۔
پولیس ترجمان نے کہا کہ لاشوں کو ایس ڈی ایچ بانہال منتقل کیا گیا اور پوسٹ مارٹم اور دیگر رسمی کارروائیوں کے لیے ڈاکٹروں کے بورڈ کی تشکیل کیلئے بی ایم او سے درخواست کی گئی۔
ترجمان نے کہا’’چونکہ یہ معاملہ ایک اندھے قتل کے طور پر ظاہر ہوا اور مجرم کا سراغ لگانے اور اس کے پاؤں کے نشانات کے لیے مختلف تھیوریوں پر کام کرنے کے لیے ایس ڈی پی او بانہال کی سربراہی میں ایک خصوصی تحقیقاتی ٹیم تشکیل دی گئی ہے ‘‘۔
ان کا کہنا تھا’’ٹیم کے اراکین کی بھرپور کوششوں کے بعد انسانی اور تکنیکی ذہانت کو اکٹھا کیا گیا اور سائنسی تجزیہ کی بنیاد پر ایک مشتبہ شخص انیل کمار ولد سدھیر ساہنی ساکن بہوروا ویسٹ چمپارن مجہولیہ بہار کی شناخت کی گئی اور اس کو میر بازار قاضی گنڈ ضلع کولگام سے گرفتار کیا گیا‘‘۔
بیان میں کہا گیا کہ بعد میں متوفین کی شناخت ۳۰سالہ دھنمتی دیوی زوجہ مرحوم نند کشور ساکن وارڈ نمبر ۳ نوادیہ سوگولی مشرقی چمپارن بہار‘۹سالہ سہانی کماری (بیٹی) اور ۵سالہ یش کمار (بیٹا) کے طور پر ہوئی۔
ترجمان نے کہا کہ سائنسی شواہد کی بنیاد پر مسلسل پوچھ گچھ اور جرح کے بعد ملزم نے اپنے جرم کا اعتراف کر لیا۔ان کا کہنا تھا کہ اس سلسلے میں مزید تحقیقات جاری ہے اور ایس ایس پی رام بن اور ایڈیشنل ایس پی رام بن کی طرف سے پوری تفتیش کی کڑی نگرانی کی جا رہی ہے ۔
