سی آر پی ایف کا خط راہل کو دھمکانے کی کوشش: کانگریس

نئی دہلی، 11 ستمبر (یواین آئی) کانگریس نے سابق پارٹی صدر راہل گاندھی کی سیکورٹی کو لے کر سینٹرل ریزرو پولیس فورس (سی آر پی ایف) کی طرف سے کانگریس صدر ملکارجن کھرگے کو لکھے گئے خط پر سخت ردعمل ظاہر کرتے ہوئے اسے ڈرانے کی کوشش قرار دیا ہے ۔
جمعرات کو اس خط کا حوالہ دیتے ہوئے کانگریس کے کمیونیکیشن ڈپارٹمنٹ کے سربراہ پون کھیڑا نے سوشل میڈیا ایکس پر ایک پوسٹ میں کہا کہ سی آر پی ایف کی طرف سے خط بھیجنے کا وقت اور اسے فوری طور پر عام کرنے کا ارادہ پریشان کن ہے ۔ انہوں نے کہا کہ مسٹر گاندھی کے سیکورٹی پروٹوکول سے متعلق لکھے گئے خط کی ٹائمنگ اور اسے عام کرنے سے سوال اٹھتے ہیں۔
انہوں نے کہاکہ "یہ خط ایک ایسے وقت میں آیا ہے جب مسٹر گاندھی الیکشن کمیشن کے ساتھ ملی بھگت سے بی جے پی کی طرف سے ووٹ چوری کے خلاف محاذ کھول رہے ہیں۔ کیا یہ اپوزیشن لیڈر کو دھمکانے کی ایک پردہ پوشی کی کوشش ہے ، جو پہلے ہی ایک اور انکشاف کر چکے ہیں۔ کیا حکومت ان کے ذریعہ سچائی کے سامنے آنے سے خوفزدہ ہے ؟”
سی آر پی ایف کے وی وی آئی پی سیکورٹی چیف سنیل جون نے بدھ کو مسٹر کھرگے کو ایک خط لکھا جس میں مسٹر گاندھی پر سیکورٹی پروٹوکول کی پیروی نہ کرنے کا الزام لگایا۔ خط میں کہا گیا ہے کہ مسٹر گاندھی اپنی سیکورٹی کو ‘سنجیدگی سے ‘ نہیں لے رہے ہیں اور بغیر بتائے غیر ملکی دوروں پر جا رہے ہیں۔
سی آر پی ایف نے خط میں اس سال مسٹر گاندھی کے کچھ غیر ملکی دوروں کا ذکر کیا ہے اور کہا ہے کہ مسٹر گاندھی نے 30 دسمبر سے 9 جنوری تک اٹلی کا دورہ کیا، پھر 12 سے 17 مارچ تک ویتنام، 17 سے 23 اپریل تک دبئی، 11 سے 18 جون تک قطر، 25 جون سے 6 جولائی تک لندن اور حال ہی میں وہ ملائشیا کے چار روزہ دورے پر گئے ۔
غور طلب ہے کہ مسٹر گاندھی کو زیڈ زمرہ کی سیکورٹی حاصل ہے جو ان لوگوں کو فراہم کی جاتی ہے جنہیں سنگین خطرات کا سامنا ہے ۔