ہم دنیا میں آٹوموبائل سیکٹر میں نمبر ون بن سکتے ہیں: گڈکری

نئی دہلی، 11 ستمبر (یو این آئی) روڈ ٹرانسپورٹ اور ہائی ویز کے وزیر نتن گڈکری نے جمعرات کو کہا کہ ہندوستانی آٹوموبائل انڈسٹری کی ملک کی معیشت میں اہم شراکت ہے اور یہ دنیا میں پہلے نمبر پر پہنچنے کی صلاحیت رکھتی ہے ۔
مسٹر گڈکری نے گھریلو آٹوموبائل مینوفیکچررز کی تنظیم ایس آئی اے ایم کے سالانہ کنونشن میں کہا کہ کچھ سال پہلے ہندوستانی آٹوموبائل انڈسٹری دنیا میں ساتویں نمبر پر تھی، آج ہم جاپان کو پیچھے چھوڑ کر تیسرے نمبر پر پہنچ گئے ہیں۔ انہوں نے کہا کہ مجھے آپ سب کی صلاحیتوں پر بھروسہ ہے ، اگر آپ سب مل کر کام کریں تو ہم دنیا میں آٹوموبائل سیکٹر میں نمبر ون بن سکتے ہیں۔ پانچ ٹریلین ڈالر کی معیشت بنانے کے وزیر اعظم کے خواب میں اس صنعت کا سب سے اہم کردار ہے ۔
انہوں نے کہا کہ 40 فیصد فضائی آلودگی گاڑیوں کی وجہ سے ہوتی ہے ۔ حکومت اب آلودگی کو کم کرنے کے لیے بائیو فیول کو فروغ دے رہی ہے ۔ اس کے علاوہ بی ایس سیون معیار لانے پر غور کیا جا رہا ہے ۔
پٹرول میں ایتھنول کی ملاوٹ کے بارے میں مسٹر گڈکری نے کہا کہ ای20 (20 فیصد مرکب) سے آگے کوئی قدم اٹھاتے ہوئے آٹوموبائل انڈسٹری کے ساتھ بھی بات چیت کی جائے گی۔ سوشل میڈیا پر ای 20 کے خلاف حالیہ مہم کو ” پیڈ” قرار دیتے ہوئے انہوں نے کہا کہ اگرچہ یہ مہم ایتھانول کے خلاف تھی لیکن اسے سیاسی طور پر نشانہ بنانا تھا۔
انہوں نے کہا کہ ایتھنول پیٹرولیم کی درآمدات کا متبادل ہے ، اس سے آلودگی کم ہوتی ہے اور کسانوں کی آمدنی میں اضافہ ہوگا۔
انہوں نے آٹوموبائل انڈسٹری کے لوگوں سے اپیل کی کہ وہ گاڑیوں کی جانچ کے مراکز قائم کریں اور اسکریپنگ کو فروغ دیں۔ انہوں نے کہا کہ وہ پرانی گاڑیوں کو ختم کرکے نئی گاڑیاں خریدنے والوں کے لیے گڈز اینڈ سروسز ٹیکس (جی ایس ٹی) میں چھوٹ کے لیے حکومت کے اندر بھی لابنگ کر رہے ہیں۔ ملک میں ہر سال 60 لاکھ ٹن اسکریپ اسٹیل درآمد کیا جاتا ہے جب کہ نئی اسکریپ پالیسی لانے کے بعد اب 3.76 لاکھ ٹن اسکریپ اسٹیل کو اندرون ملک فراہم کیا جارہا ہے ۔