سعودی ولی عہد کا قطر پر اسرائیلی حملوں کے بعد بڑا بیان

ریاض، 11 ستمبر (یو این آئی) سعودی ولی عہد شہزادہ محمد بن سلمان نے خطے میں اسرائیلی حملوں کو مسترد کرتے ہوئے ان کی سخت ترین الفاظ میں مذمت کی ہے ۔
غیر ملکی ذرائع ابلاغ کے مطابق سعودی ولی عہد شہزادہ محمد بن سلمان نے شوریٰ کونسل کے سالانہ اجلاس سے خطاب میں کہا کہ خطے میں اسرائیلی حملوں کو مسترد اور ان کی بھرپور مذمت کرتے ہیں، جن میں برادر ملک قطر پر کیا گیا حالیہ حملہ بھی شامل ہے ۔
ہم قطر کے ساتھ ہیں اوراس کی جانب سے اٹھائے جانے والے ہر اقدام میں ساتھ دیں گے ، جس کیلئے تمام ترصلاحیتیں بروئے کار لائیں گے ۔ انہوں نے مزید کہا غزہ فلسطینی سرزمین ہے ، جس پر اس کے عوام کا حق ہے ، جسے کسی طرح چھینا نہیں جاسکتا۔ سعودی ولی عہد امیر قطر سے ملاقات کیلئے آج دوحہ جائیں گے ۔