ڈھاکہ یونیورسٹی طلبہ یونین کے انتخابات میں ‘بنگلہ دیش اسلامی چھاترا شبر’ کامیاب

ڈھاکہ، 10 ستمبر (یو این آئی) ڈھاکہ یونیورسٹی میں طلبہ یونین کے انتخابات میں جماعت اسلامی کی برادر تنظیم ‘بنگلہ دیش اسلامی چھاترا شبر’ کامیابی حاصل کرنے میں کامیاب ہوگئی، چھاترا شِبر کے نامزد امیدواران نائب صدارت، جنرل سیکرٹری اور اسسٹنٹ جنرل سیکرٹری کی نشستوں پر بھاری اکثریت سے جیت گئے ۔
غیر ملکی ذرائع ابلاغ کے مطابق نائب صدارت کے لیے اسلامی چھاترا شبر کے صادق قیم 14042ووٹ لے کر منتخب ہوگئے ، بنگلہ دیش نیشنلسٹ پارٹی(سربراہ خالدہ ضیا) کی حامی طلبہ تنظیم چھاترا دَل کے عابد الاسلام نے 5708 ووٹ حاصل کرسکے جبکہ شمیم حسین نے 3389 ووٹ اور امامہ فاطمہ 3389 ووٹ کرسکیں۔
چھاترا شبر کے ایس ایم فرہاد جنرل سیکرٹری کی نشست کے لیے 10794 ووٹ لے کر منتخب ہوگئے جبکہ چھاترا دل کے تنویر حمیم نے 5283 ووٹ اور مگمولرباسو 4949 ووٹ حاصل کرسکے ۔
اسلامی چھاترا شبر کے محمد محی الدین اسسٹنٹ جنرل سکریٹری کی نشست کے لیے 11772 ووٹ لے کر منتخب ہوگئے ، چھاترا دل کے تنویر الہادی نے 5064 ووٹ اور اشریفہ خاتون 900 ووٹ حاصل کرسکیں۔
یاد رہے کہ یونیورسٹی سطح پر نائب صدر، جنرل سیکرٹری، اسسٹنٹ سیکرٹری جنرل سمیت یونین کی 28 نشستوں کے لیے 471 امیدوار آمنے سامنے تھے ، صدر کا عہدہ نہیں ہے ، اس کے علاوہ یونیورسٹی کے 18 ہالز کی سطح پر بھی 234 نشستوں کے لیے یونین کے انتخابات ہوئے ہیں، جن پر 1035 امیدواروں کے درمیان مقابلہ تھا۔
گزشتہ سال کوٹہ مخالف تحریک کا ڈھاکہ یونیورسٹی ہی سے آغاز ہوا تھا جو بعدازاں حکومت مخالف طلبہ انقلاب میں تبدیل ہوگئی تھی۔
رپورٹس کے مطابق ابتدا میں جماعت اسلامی کی برادر تنظیم ‘اسلامی چھاترا شبر’ نے اس احتجاج کی کھلے عام قیادت نہیں کی تھی، تاہم بعض ذرائع کا کہنا ہے کہ شبر کے کارکن پسِ پردہ احتجاج میں شامل تھے ، بعض مقامات پر مظاہروں اور ہڑتالوں کے دوران شبر کے طلبہ سامنے آئے ، مگر انہوں نے اپنی شناخت کو ظاہر نہیں کیا۔