ولیمز اور ٹیلر کی واپسی، سری لنکا کے خلاف ٹی-20 سیریز کے لیے زمبابوے ٹیم کا اعلان

ہرارے، 02 ستمبر (ٰٰٰیواین آئی) زمبابوے نے سری لنکا کے خلاف آئندہ تین میچوں کی ٹی-20 بین الاقوامی سیریز کے لیے 16 رکنی ٹیم کا اعلان کیا ہے، جس میں تجربہ کار کھلاڑی سین ولیمز اور برینڈن ٹیلر کی واپسی خاص توجہ کا مرکز ہے۔
تجربہ کار آل راؤنڈر ولیمز مئی 2024 میں بنگلہ دیش کے خلاف آخری بار کھیلنے کے بعد اس مختصر فارمیٹ میں دوبارہ شامل ہوئے ہیں۔ ان کے ساتھ تجربہ کار وکٹ کیپر-بلے باز برینڈن ٹیلر بھی اسکواڈ کا حصہ ہیں، جنہوں نے حال ہی میں آئی سی سی کی پابندی کے بعد ٹیسٹ اور ون ڈے فارمیٹس میں واپسی کی تھی۔
ولیمز اور ٹیلر کے علاوہ بریڈ ایوانز اور تادیواناشے مارومانی کو بھی ٹیم میں شامل کیا گیا ہے۔ دوسری جانب پچھلے ماہ نیوزی لینڈ اور جنوبی افریقہ کے خلاف سہ رخی سیریز کھیلنے والی ٹیم سے نیومن نیامہوری، ویسلی مادھیویری، ونسنٹ ما سیکیسا اور تفضاوا سِگا کو ڈراپ کر دیا گیا ہے۔
زمبابوے اسکواڈ:
سکندر رضا (کپتان)، برائن بینٹ، راین برل، بریڈ ایوانز، ٹریور گوانڈو، کلا ئیو مداندے، ٹینوٹینڈا ماپوسا، تادیواناشے مارومانی، ویلنگٹن ماساکاڈزا، ٹونی منیونگا، تاشنگا موسیکیووا، بلیسنگ مزرابانی، ڈایون مائرز، رچرڈ نگاروا، برینڈن ٹیلر، سین ولیمز۔
پہلا ٹی-20 میچ بدھ، 3 ستمبر کو ہرارے میں کھیلا جائے گا۔