کیرن سیکٹر میں گولیوں کے تبادلے میں دو افراد ہلاک : فوج کا دعویٰ

سرینگر/۲۸جون
پولیس کا کہنا ہے کہ فوج نے کیر ن سیکٹر میں انڈیا گیٹ ۔بچھو علاقے میں تار بندی کے نزدیک گولیوں کے تبادلے کے دوران دو افراد کو ہلاک کردیا ہے ۔
پولیس کے ایک ترجمان نے بتایا فوج نے اطلاع دی ہے کہ منگل کے روز تین بجے کے قریب کیرن سیکٹر میں انڈیا گیٹ۔بچھو علاقے میں تاربندی کے نزدیک فوج کی گشتی پارٹی نے مشتبہ نقل وحرکت دیکھی جس کو چیلنج کیا گیا جس دوران دو بدو گولیوں کا تبادلہ ہوا۔
ترجمان نے بتایا کہ گولیوں کا تبادلہ تھم جانے کے بعد وہاں تلاشی کارروائی شروع کی گئی جس دوران دو افراد کی لاشیں برآمد کی گئیں۔
پولیس ترجمان نے بتایا کہ جان بحق افراد کے قبضے سے۴اے کے رائفلیں‘ ۸میگزین اور دو منشیات کی اشیاءسے بھرے پیکٹ برآمد کرکے ضبط کئے گئے ۔انہوں نے مزید کہاکہ اُس پار تار بندی کے نزدیک دو اے کے رائفلیں ، میگزین اور چار گرینیڈ بھی پائے گئے ۔
ترجمان کا کہنا ہے کہ فوج نے دونوں کی شناخت ماجد چچی اور شمس الدین بیگ کے بطور کی ہے ۔انہوں نے کہاکہ جان افراد اسلحہ و گولہ بارود اور منشیات کی کھیپ حاصل کرنے اور ایل او سی پر واقع روٹا نار کے علاقے میں جنگجوو¿ں کو دراندازی کی خاطر آسان راہداری فراہم کرنے کی خاطر آئے ہوئے تھے ۔
پولیس ترجمان نے بتایا کہ جاں بحق افرادکے قبضے سے پانچ رائفلیں‘ ایک شارٹ گن ‘۱۵میگزین‘۱۲۸گولیوں کے راو¿نڈ‘۱۷۷دوسرے راو¿نڈ‘ گرینیڈس کے علاوہ منشیات کے دو پیکٹ بھی برآمد کرکے ضبط کئے گئے ہیں۔پولیس کے مطابق اس ضمن میں کیس درج کرکے مزید تحقیقات شروع کی گئی ۔