امرت بھارت ٹرین میں عالمی معیار کی سہولیات فراہم کی گئی ہیں: ویشنو

نئی دہلی// ریلوے کے وزیر اشونی ویشنو نے بدھ کو لوک سبھا میں بتایا کہ امرت بھارت ایکسپریس ٹرین میں عالمی سطح کی سہولیات فراہم کرائی گئی ہیں اور مختلف علاقوں سے اس ٹرین اور وندے بھارت ٹرین کو چلانے کی مانگ بڑھ رہی ہے ۔
وقفہ سوال کے دوران ایک سوال کے جواب میں مسٹر ویشنو نے کہا کہ متوسط اور کم آمدنی والے طبقے کے لیے چلائی جانے والی امرت بھارت ٹرین میں سی سی ٹی وی کیمرے ، نئے ڈیزائن والے بیت الخلاء، موبائل فون چارجنگ وغیرہ کی سہولیات فراہم کی گئی ہیں۔ اس ٹرین اور وندے بھارت ٹرین کو چلانے کی مانگ ملک کے مختلف علاقوں سے مسلسل آرہی ہے ۔
انہوں نے کہا کہ تین سال میں وندے بھارت ٹرین کی 144 خدمات چلائی گئی ہیں۔ پورے ہندوستان کو وندے بھارت سروس سے کور کرلیا گیا ہے ۔
آئی یو ایم ایل کے ای ٹی محمد بشیر کے ایک سوال کے جواب میں، وزیر ریلوے نے کہا کہ کیرالہ میں ریلوے خدمات کو وسعت دینے کے لیے کافی کام کیا گیا ہے ۔ ریاست میں ریلوے خدمات کی توسیع کے لیے مودی حکومت کے دور میں جتنا کام ہوا ہے ، اتنا 60 برسوں میں بھی نہیں کیا گیا تھا۔ کیرالہ میں ریلوے خدمات کو وسعت دینے کے لیے مستقبل میں مزید کام کیا جائے گا۔