لوک سبھا میں اسکولوں میں تعینات باورچیوں کی تنخواہیں بڑھانے کا مطالبہ

نئی دہلی// کانگریس کے منوج کمار نے بدھ کے روز لوک سبھا میں پردھان منتری پوشن یوجنا کے تحت اسکولوں میں کھانا فراہم کرنے کے لیے مقرر کیے گئے باورچیوں کی تنخواہ اور سروس کی شرائط کا معاملہ اٹھایا اور ان کی تنخواہ میں اضافے کا مطالبہ کیا۔
مسٹر منوج کمار نے یہ مسئلہ وقفۂ صفر کے دوران اٹھایا اور کہا کہ باورچیوں سے ہر روز کام لیا جاتا ہے اور انہیں اتوار کو بھی کام پر بلایا جاتا ہے ۔ بہار میں باورچیوں کو صرف 1650روپے ملتے ہیں۔ ان میں سے ایک ہزار روپے مرکزی حکومت فراہم کرتی ہے ۔ انہوں نے کہا کہ یہ رقم بہت کم ہے ان کی تنخواہ میں اضافہ کیا جائے ، انہیں کم از کم 10 ہزارروپے ماہانہ دیئے جائیں۔انہوں نے مطالبہ کیا کہ انہیں 65 سال کی عمر میں ریٹائر کیا جائے ۔
راشٹریہ لوک دل کے چندن چوہان نے آزادی اظہار کے نام پر سوشل میڈیا کے ذریعے سماج مخالف مواد پیش کرنے پر پابندی لگانے کا مطالبہ کیا۔
کانگریس کے سپت گیری شنکر اولاکا نے اڈیشہ کے بالاسور میں ایک طالبہ کی خودکشی کا معاملہ اٹھایا اور اس طرح کے واقعات کو روکنے کے لیے سخت اقدامات کا مطالبہ کیا۔
بھارتیہ جنتا پارٹی کے انل فیروزیہ نے مطالبہ کیا کہ اجین کے مہاکال مندر کی سیکورٹی سینٹرل انڈسٹریل سیکورٹی فورس یا سینٹرل ریزرو پولیس فورس فراہم کرے ۔
سماج وادی پارٹی کے جتیندر کمار دوہرے نے اتر پردیش میں پرائمری اسکول بندکیے جانے کا مسئلہ اٹھایا اور کہا کہ اس سے ان اسکولوں کے ہیڈ ماسٹروں کی ترقی متاثر ہورہی ہے ۔ اسکول بند ہونے کی وجہ سے وہاں کام کرنے والے دیگر ملازمین کی نوکریاں خطرے میں پڑ گئی ہیں۔ انہوں نے کہا کہ ان اسکولوں میں کھانا تیار کرنے کے لیے مقرر کیے گئے باورچی اپنی ملازمت سے ہاتھ دھو بیٹھیں گے ۔
عام آدمی پارٹی کے گرمیت سنگھ میت ہیر نے ایک ہی مرکب کی دوائیں مختلف قیمتوں پر دستیاب ہونے کا مسئلہ اٹھایا اور کہا کہ کمپنیاں من مانی قیمتیں طے کرکے عوام کو لوٹ رہی ہیں۔
بھارت آدیواسی پارٹی کے راج کمار روت نے بانسواڑہ علاقے میں قبائلیوں کے بے گھر ہونے کا مسئلہ اٹھایا اور مطالبہ کیا کہ قبائلیوں کو ان کی اصل جگہوں پر رہنے دیا جائے ۔
راشٹریہ لوک تانترک پارٹی کے ہنومان بینیوال نے راجستھان میں بھرتی امتحانات میں پیپر لیک ہونے کا معاملہ اٹھایا اور کہا کہ اب تک کے پیپر لیک ہونے کے معاملات کی جانچ مرکزی تفتیشی بیورو سے کرائی جانی چاہئے ۔ انہوں نے اسے روکنے کے لیے نئے قانون بنائے جانے کا مطالبہ بھی کیا۔
ریولیوشنری سوشلسٹ پارٹی کے این کے رام چندرن نے انسانی اسمگلنگ کا مسئلہ اٹھایا اور کہا کہ نوجوانوں کو اچھی نوکریوں کا لالچ دے کر ملک سے باہر لے جایا جاتا ہے اور وہاں مختلف طریقوں سے تشدد کا نشانہ بنایا جاتا ہے ۔ انہوں نے مطالبہ کیا کہ تھائی لینڈ میں پھنسے ہوئے ایسے کچھ ہندوستانیوں کو واپس لانے کے لیے فوری کوششیں کی جائیں۔
سماج وادی پارٹی کے رام شنکر راج بھر نے لوگوں بالخصوص نوجوانوں کی اچانک موت کا مسئلہ اٹھایا اور حکومت سے مطالبہ کیا کہ حکومت کو اس کا پتہ لگانا چاہیے کہ لوگوں کی اچانک موت کیوں ہورہی ہے ۔ انہوں نے یہ بھی مطالبہ کیا کہ ایسے معاملات میں لواحقین کو مناسب مالی امداد فراہم کی جائے تاکہ متاثرہ کنبہ اپنی روزی روٹی کما سکیں۔