اننت ناگ:منشیات فروشوں کی۴۰لاکھ روپے مالیت کی جائیداد ضبط

سرینگر//
منشیات کا کاروبار کرنے والوں کے خلاف اپنی مہم جاری رکھتے ہوئے پولیس نے منشیات سے وابستہ افراد کی تقریباً ۴۰ لاکھ روپے مالیت کی جائیداد ضبط کر لی ہے ۔
پولیس کے مطابق، تھانہ بجبہاڑہ میں ایف آئی آر نمبر۲۰۲۲/۱۷۵کے تحت درج کیس کے سلسلے میں محمد افضل بٹ ولد ثناء اللہ بٹ ساکن مومن ڈنجی بجبہاڑہ کی رہائشی جائیداد کو ضبط کیا گیا ہے ۔ یہ کارروائی منشیات کے ذریعے حاصل کی گئی غیر قانونی دولت کو ختم کرنے کے مقصد سے کی گئی۔
اسی طرح ایف آئی آر نمبر۲۰۲۵/۱۰۲کے درج ایک اور کیس میں سبزار احمد ڈار ولد نذیر احمد ڈار ساکن واگہامہ بجبہاڑہ کی ہنڈائی کریٹا گاڑی کو بھی ضبط کیا گیا۔پولیس کا کہنا ہے کہ ضبط شدہ رہائشی مکان اور گاڑی کی مشترکہ مارکیٹ قیمت تقریباً ۴۰لاکھ روپے ہے ۔
پولیس نے عوام سے اپیل کی ہے کہ وہ منشیات کی لعنت کے خاتمے کے لیے آگے آئیں اور کسی بھی مشتبہ سرگرمی کی اطلاع قریبی پولیس اسٹیشن کو دیں تاکہ ضلع کو منشیات سے پاک بنایا جا سکے ۔
اس دوران پولیس نے شمالی کشمیر کے ضلع کپواڑہ کے ترہگام علاقے میں ایک منشیات فروش کو گرفتار کرکے اس کی تحویل سے ممنوعہ مواد بر آمد کیا ہے ۔
ایک پولیس ترجمان نے اپنے ایک بیان میں کہا کہ پولیس اسٹیشن ترہگام کی ایک پارٹی نے شمناگ کے نزدیک ناکہ لگا دیا۔
ترجمان نے کہا کہ اس دوران کرال پورہ سے شمناگ کی طرف آنے والے ایک شخص کو بر سر موقع ہی دھر لیا گیا جس نے پولیس کو دیکھ کر فرار ہونے کی کوشش کی۔
ان کا کہنا تھا کہ گواہوں کی موجودگی میں تلاشی کے دوران اس کی تحویل سے اچھی مقدار میں چرس جیسا ممنوعہ مواد بر آمد کیا گیا جس کے بعد اس کی گرفتاری عمل میں لائی گئی۔
گرفتار شدہ کی شناخت فیصل احمد پرے ولد ولی محمد پرے ساکن ترہگام کپواڑہ کے طور پر کی گئی۔
بیان میں کہا گیا کہ اس ضمن میں پولیس اسٹیشن ترہگام میں این ڈی پی ایس ایکٹ کے تحت ایک کیس درج کرکے مزید تحقیقات شروع کی گئی۔
انہوں نے کہا کہ کپواڑہ پولیس معاشرے سے منشیات کی بیخ کنی کو یقینی بنانے کے لئے پر عزم ہے ۔
اس دوران پولیس نے ضلع پونچھ کے سرنکوٹ علاقے میں ایک خاتون کی تحویل سے ہیرائن جیسا ممنوعہ مواد بر آمد کیا۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس اسٹیشن سرنکوٹ کی ایک ٹیم سرنکوٹ کے اولڈ تحصیل کے نزدیک معمول کی ناکہ چیکنگ میں مصروف تھی کہ اس دوران ایک خاتون کی تلاشی لی گئی جس کی تحویل سے۶گرام ہیرائن جیسا مواد بر آمد کیا گیا۔
خاتون کی شناخت بشریٰ بی زوجہ مرحوم عبدالرشید ساکن سرنکوٹ اولڈ تحصیل کے طور پر کی گئی۔انہوں نے کہا کہ اس سلسلے میں پولیس اسٹیشن سرنکوٹ میں این ڈی پی ایس ایکٹ کے تحت ایک کیس درج کرکے مزید تحقیقات شروع کی گئیں۔
بیان میں کہا گیا کہ اس کارروائی سے منشیات کی بیخ کنی کو یقینی بنانے کے لئے پولیس کا عزم ظاہر ہوتا ہے ۔