آئی پی ایل فائنل کو مسلح افواج کے لیے وقف کرنا ایک قابل ستائش قدم ہے: گمبھیر

نئی دہلی//ہندوستانی کرکٹ ٹیم کے چیف کوچ گوتم گمبھیر نے بدھ کے روز کہا کہ ہندوستانی کرکٹ کنٹرول بورڈ (بی سی سی آئی) کا انڈین پریمیئر لیگ (آئی پی ایل) 2025 کے فائنل میچ کو مسلح افواج کے نام وقف کرنا واقعی ایک ناقابل یقین قابل ستائش قدم ہے اور یہ ہماری قومی یکجہتی کو ظاہر کرتا ہے۔
گمبھیر نے پریس کانفرنس سے کہا، "میں اکثر کئی معاملات میں بی سی سی آئی کی تنقید کرتا رہا ہوں، لیکن یہ اقدام واقعی قابل تعریف ہے۔ مسلح افواج کے لیے کسی بھی کام کو ہماری مکمل حمایت حاصل ہے۔۔ انہوں نے کہا کہ یہ ایک اچھا اقدام ہے۔ یہ ظاہر کرتا ہے کہ پورا ملک متحد ہے اور ہماری مسلح افواج کو سلام پیش کر رہا ہے۔ بغیر کسی مفاد کے ہماری حفاظت کرنے کے لیے میں مسلح افواج کو کریڈٹ دیتاہوں۔”
چیف کوچ گمبھیر نے کہا، "ہمارے فوجی بدلے میں کچھ توقع کیے بغیر ہماری خدمت کرتے ہیں، حفاظت کرتے ہیں اور قربانیاں دیتے ہیں۔ گمبھیر نے یہ تبصرہ پہلگام دہشت گردانہ حملے کے جواب میں ہندوستانی مسلح افواج کی طرف سے چلائے گئے آپریشن سندور کے بعد بی سی سی آئی کی طرف سے آئی پی ایل 2025 کی اختتامی تقریب کو مسلح افواج کے نام وقف کرنے کے فیصلے کے ساتھ یکجہتی کے طور پر کیا۔آئندہ تین جون کو احمدآباد کے نریندر مودی اسٹیڈیم میں منعقد ہونے والے آئی پی ایل کے فائنل میچ میں فوج، بحریہ اور فضائیہ کے اعزاز میں فوجی بینڈ اور ثقافتی پروگراموں کی 45 منٹ کی تقریب منعقد کی جائے گی۔ اختتامی تقریب میں فوج کے سربراہان سمیت اعلیٰ فوجی افسران کو مدعو کیا گیا ہے۔
بی سی سی آئی نے کہا کہ اس اقدام کا مقصد مسلح افواج کی بے لوث خدمت اور بہادری پر قوم کی شکر گزاری کو اجاگر کرنا ہے۔ بی سی سی آئی کے سیکریٹری دیو جیت سیکیا نے تقریب کی تصدیق کرتے ہوئے کہا کہ کرکٹ ملک کو متحد کرتا ہے۔ انہوں نے کہا کہ ملک، اس کی خودمختاری، سالمیت اور سلامتی سے بڑھ کر کچھ نہیں ہے۔