انگلینڈ کی خواتین ٹیم نے ویسٹ انڈیز کو آٹھ وکٹوں سے شکست دی

کینٹربری//گیند بازوں کی شاندار کارکردگی کے بعد صوفیہ ڈنکلی (ناٹ آؤٹ 81) اور ہیتھر نائٹ (43) کی عمدہ اننگز کی بدولت انگلینڈ کی خواتین ٹیم نے ویسٹ انڈیز کو 21 گیندیں باقی رہتے ہوئے آٹھ وکٹوں سے ہرا دیا۔
سینٹ لارنس گراؤنڈ میں بدھ کی رات کھیلے گئے میچ میں انگلینڈ کی خواتین ٹیم نے ٹاس جیت کر پہلے گیند بازی کرنے کا فیصلہ کیا۔ بیٹنگ کے لیے اتری ویسٹ انڈیز کے لیے کپتان ہیلی میتھوز نے آخر تک مورچہ سنبھالے رکھا۔ میتھوز نے 67 گیندوں پر 16 چوکوں اور ایک چھکے کے ساتھ (ناٹ آؤٹ 100) رنز کی اننگز کھیلی۔ اس کے علاوہ مینڈی مینگرو (17) اور نے ایس غزنوی(11) رنز کا تعاون دیا۔ ویسٹ انڈیز کے پانچ بلے بازدہائی کے ہندسے تک بھی نہ پہنچ سکے۔ ویسٹ انڈیز کی ٹیم نے مقررہ 20 اوورز میں سات وکٹوں پر 146 رنز کا اسکور بنایا۔
انگلینڈ کی خواتین ٹیم کے لیے لارین بیل نے دو وکٹیں حاصل کیں۔ لنسی اسمتھ، ایملے آرلٹ اور ای سی وونگ نے ایک ایک بلے بازکو آؤٹ کیا۔
اس کے بعد بلے بازی کے لیے اتری انگلینڈ کے لیے ڈینیئل وائٹ اور صوفیہ ڈنکلی کی اوپننگ جوڑی نے اچھی شروعات کرتے ہوئے پہلی وکٹ کے لیے (51) رنز جوڑے۔ چھٹے اوور میں جی جیمز نے ڈینیئل وائٹ (17) کو آؤٹ کر کے اس شراکت کو توڑا۔ اس کے بعد صرف پانچ رنز کے اضافے پر انگلینڈ نے کپتان نیٹ سیور برنٹ (صفر) کی وکٹ گنوا دی۔ اس کے بعد بلے بازی کے لیے آئی ہیتھر نائٹ نے صوفیہ ڈنکلی کے ساتھ اننگز سنبھالی اور تیزی سے رنز بنائے۔ دونوں بلے بازوں کے درمیان 94 رنز کی میچ جیتنے والی ناٹ آوٹ شراکت ہوئی۔ انگلینڈ کی خواتین ٹیم نے 16.3 اوورز میں دو وکٹوں پر 150 رنز بنا کر میچ آٹھ وکٹوں سے جیت لیا۔ اس کے ساتھ ہی انگلینڈ نے تین میچوں کی سیریز میں 1-0 سے برتری حاصل کر لی۔
ویسٹ انڈیز کی جانب سے جیمز اور فلیچر نے ایک ایک بلے بازکو آؤٹ کیا۔