واشنگٹن میں ہندوستان اور امریکہ کی تجارتی میٹنگ اختتام پذیر، اگلی میٹنگ مئی میں

نئی دہلی//ہندوستان-امریکہ دو طرفہ تجارتی معاہدے پر جاری بات چیت کے ایک حصے کے طور پر ہندوستان کے کامرس ڈپارٹمنٹ اور امریکی تجارتی نمائندے کے دفتر کے نمائندوں نے واشنگٹن میں منعقدہ میٹنگ میں نتیجہ خیز بات چیت کی۔
اگلی میٹنگ مئی میں ہوگی۔
وزارت تجارت اور صنعت نے منگل کو ایک ریلیز میں کہا کہ مذاکرات کا یہ جامع اجلاس 23 سے 25 اپریل تک واشنگٹن میں منعقد ہوا۔ پچھلے مہینے کے شروع میں دونوں طرف کے عہدیدار دہلی میں بیٹھے تھے ۔ یہ ملاقاتیں ذاتی طور پر اور ویڈیو کانفرنسنگ کے ذریعے ہو رہی ہیں۔
واشنگٹن میٹنگوں کے دوران ٹیم نے درآمدات پر ٹیرف اور نان ٹیرف کے مسائل سمیت وسیع پیمانے پر مسائل پر وسیع اور نتیجہ خیز بات چیت کی۔ دونوں فریقوں نے اگلے موسم خزاں تک باہمی طور پر فائدہ مند، کثیر شعبہ جاتی دو طرفہ تجارتی معاہدے کے پہلے مرحلے کو مکمل کرنے کے اقدامات پر تبادلہ خیال کیا، جس میں ایسے مواقع پر بات چیت بھی شامل ہے جو ابتدائی مرحلے میں دونوں فریقوں کے لیے فائدہ مند ہوں گے ۔
ریلیز میں کہا گیا ہے کہ”واضح رہے کہ ورچول سیکٹرل ماہرین کی سطح کی میٹنگیں نتیجہ خیز رہی ہیں، اور مئی کے آخر سے ذاتی طور پر سیکٹرل میٹنگز کا منصوبہ بنایا گیا ہے ۔’’
فروری میں واشنگٹن میں وزیر اعظم نریندر مودی اور صدر ڈونالڈ ٹرمپ کے درمیان ہونے والی چوٹی کانفرنس میں دونوں فریقوں نے ہندوستان امریکہ اقتصادی تعلقات اور سپلائی چین انضمام کو مزید بڑھانے اور وسعت دینے کے منصوبے پر کام کرنے کا عزم کیا۔ موجودہ بات چیت اس میٹنگ کے مشترکہ اعلامیہ کے مطابق ایک دوطرفہ تجارتی معاہدہ طے کرنے کی کوشش کا حصہ ہے ۔