کشمیر میں موسم خشک و خوشگوار۹مارچ سے تبدیلی متوقع:ترجمان

سرینگر//
محکمہ موسمیات کی پیش گوئی کے عین مطابق وادی کشمیر میں موسم خشک و خوشگوار ہے جس سے لوگ محظوظ ہو رہے ہیں۔
متعلقہ محکمے کے ایک ترجمان کے مطابق وادی میں۹مارچ تک موسم خشک رہنے کا امکان ہے ۔انہوں نے کہا کہ اس کے بعد وادی میں۱۰؍اور۱۱مارچ کو پہاڑی علاقوں میں کئی مقامات پر ہلکی سے درمیانی درجے کی برف باری یا بارشوں کا امکان ہے جبکہ۱۲مارچ کو موسم عام طور پر خشک رہ سکتا ہے ۔
ان کا کہنا ہے کہ بعد ازاں۱۳؍اور۱۴مارچ کو بھی وادی میں برف و باراں کی توقع ہے ۔
ترجمان کے مطابق وادی میں سب سے زیادہ سرد مقام گلمرگ رہا جہاں کم سے کم درجہ حرارت منفی۰ء۷ڈگری سینٹی گریڈ ریکارڈ کیا گیا جبکہ جموں صوبے میں سب سے زیادہ سرد مقام بھدرواہ رہا جہاں شبانہ درجہ حرارت۸ء۱ڈگری سینٹی گریڈ ریکارڈ کیا گیا۔
ترجمان نے کہا کہ جموں وکشمیر کے دونوں صوبوں میں شبانہ درجہ حرارت معمول سے۲سے۴ڈگری سینٹی گریڈ کم ریکارڈ ہوا ہے ۔
ادھر وادی میں جمعرات کو بھی صبح سے ہی دھوپ چھائی رہی جس سے لوگوں کو مختلف مقامات جیسے صحنوں، پارکوں اور دکان تھڑوں پر بیٹھے لطف اندوز ہوتے ہوئے دیکھا گیا۔
محکمے نے اپنی ایڈوائزری میں لوگوں سے کہا ہے کہ وہ۹مارچ تک اپنے کھیت کھلیانوں اور باغوں میں کام جاری رکھ سکتے ہیں۔