وادی میںبرف باری کے بعد موسم بہتر‘فلائٹ آپریشن بحال

سرینگر//
وادی کشمیر میں تازہ برف باری کے بعد موسم میں بتدریج بہتری واقع ہو رہی ہے اور سری نگر ہوائی اڈے پر بھی فلائٹ آپریشن بحال ہوا ہے ۔
وادی کے سیاحتی مقامات گلمرگ، سونہ مرگ، پہلگام اور دودھ پتھری سمیت پہاڑی علاقوں میں گذشتہ چوبیس گھنٹوں کے دوران بھاری برف باری جبکہ میدانی علاقوں میں درمیانی درجے کی برف باری ہوئی۔
اطلاعات کے مطابق سونہ مرگ میں گذشتہ چوبیس گھنٹوں کے دوران ڈیڑھ فٹ برف ریکارڈ ہوئی ہے جبکہ دودھ پتھری اور پیر کی گلی میں ایک ایک فٹ برف جمع ہوئی ہے ۔سری نگر میں گذشتہ ۲۴گھنٹوں کے دوران۲سے۳ ؍انچ برف ریکارڈ ہوئی ہے ۔
تازہ برف باری سے سری نگر ہوائی اڈے پر پیر کی صبح فلائٹ آپریشن میں خلل واقع ہوئی۔ادھر ہوائی اڈے کے ڈائریکٹر جاوید انجم نے بتایا کہ رن وے سے برف کو ہٹایا گیا ہے اور روشنی میں بھی بہتری واقع ہوئی ہے اور اب فلائٹ آپریشن کو بحال کیا جائے گا۔انہوں نے کہا کہ پیر کو سری نگر ہوائی اڈے سے تمام ۳۷پروازوں کو اڑنے کی اجازت ہوگی۔
سری نگر ہوائی اڈے پر پیر کو لگاتار چوتھے روز صبح کے وقت فلائٹ آپریشن میں خلل واقع ہوئی۔دریں اثنا وادی میں برف باری کے بعد موسم میں بتدریج بہتری واقع ہو رہی ہے ۔
محکمہ موسمیات کے ایک ترجمان کے مطابق وادی میں۶جنوری کو موسم مجموعی طور پر ابر آلود رہ سکتا ہے اور اس دوران کہیں کہیں برف باری ہوسکتی ہے تاہم دو پہر کے بعد موسم میں بہتری واقع ہونے کا امکان ہے ۔انہوں نے کہا کہ وادی میں۷سے۱۰جنوری تک موسم مجموعی طور پر خشک رہنے کی توقع ہے ۔ان کا کہنا تھا کہ بعد ازاں وادی میں۱۱؍اور۱۲جنوری کو موسم ابر آلود رہنے کے ساتھ کہیں کہیں ہلکی برف باری کا امکان ہے جبکہ جموں کے میدانی علاقوں میں بارشیں متوقع ہیں۔انہوں نے کہا کہ وادی میں۱۳سے۱۵جنوری تک موسم ایک بار پھر مجموعی طور پر خشک رہنے کا امکان ہے ۔
محکمے نے اپنی ایڈوائزری میں کہا کہ وادی کے کچھ پہاڑی علاقوں میں سڑکوں پر پھسلن ہونے کی وجہ سے زمینی ٹرانسپورٹ کی نقل و حمل میں خلل واقع ہو سکتی ہے ۔مسافروں اور ٹرانسپورٹروں سے کہا گیا ہے کہ وہ ٹریفک ایڈوائزری کے مطابق اپنے سفر کی منصوبہ بندی کریں۔
ادھر مطلع ابر آلود رہنے سے وادی کے بیشتر مقامات پر شبانہ درجہ حرارت میں بہتری واقع ہوئی ہے ۔گرمائی دارلحکومت سرینگر میں کم سے کم درجہ حرارت منفی۵ء۰ڈگری سینٹی گریڈ ریکارڈ کیا گیا جو معمول سے۴ء۱ڈگری سینٹی گریڈ زیادہ ریکارڈ ہوا ہے ۔
سیاحتی مقام گلمرگ میں کم سے کم درجہ حرارت منفی۵ء۴ڈگری سینٹی گریڈ ریکارڈ کیا گیا جو معمول سے۳ء۳ڈگری سینٹی گریڈ زیادہ ریکارڈ ہوا تھا۔
ایک اور مشہور سیاحتی مقام پہلگام میں کم س کم درجہ حرارت منفی۴ء۱ڈگری سینٹی گریڈ ریکارڈ کیا گیا۔سرحدی ضلع کپوارہ میں کم سے کم درجہ حرارت منفی۳ء۰ڈگری سینٹی گریڈ ریکارڈ ہوا ہے ۔