نوجوانوں کو بندوق اٹھانے سے روکنے کیلئے کئی محاذوں پر کام کیا جا رہا ہے :آئی جی پی

سرینگر//
کشمیر زون پولیس کے انسپکٹر جنرل وجے کمار کا کہنا ہے کہ مقامی نوجوانوں کو جنگجوؤں کی صفوں میں شمولیت اختیار کرنے سے باز رکھنے کیلئے کثیر جہتی محاذوں پر کام کیا جا رہا ہے ۔انہوں نے کہا کہ نوجوانوں کو ملی ٹنسی کی طرف راغب کرانے والوں پر پی ایس اے عائد کیا جا رہا ہے ۔
آئی جی پی نے ان باتوں کا اظہار یہاں نامہ نگاروں کے سوالوں کے جواب دینے کے دوران کیا۔انہوں نے کہا’’پولیس نوجوانوں کو بندوق اٹھانے سے باز رکھنے کے کام میں کافی حد تک کامیاب ہوئی ہے ‘‘۔
کمار کا کہنا تھا’’ہم اس کیلئے کثیر جہتی محاذوں پر کام کر رہے ہیں والدین کی مدد سے کچھ بچوں کو واپس لائے ہیں کچھ کو گرفتار کیا ہے اور جو ان بچوں کو بندوق اٹھانے پر راضی کرتے ہیں ان پر پی ایس اے عائد کیا جاتا ہے اور ان کو باہر بھیجا جاتا ہے ‘‘۔
آئی جی پی نے کہا کہ کچھ کو انکاؤنٹرس کے دوران موقع دیتے ہیں کہ وہ سرنڈر کریں۔انہوں نے والدین سے ایک بار پھر اپیل کی کہ وہ اس معاملے میں پولیس کے ساتھ تعاون کریں۔
امر ناتھ یاترا کے بارے میں پوچھے جانے پر ان کا کہنا تھا کہ یاترا کے لئے تین سطحی سیکورٹی فراہم کی جائے گی۔