یوم آزادی کی تقریبات کیلئے سیکورٹی کے کثیر سطحی انتظامات ہیں:بردی

سرینگر//
انسپکٹر جنرل آف پولیس (آئی جی پی) کشمیر زون وی کے بردی کا کہنا ہے کہ وادی بھر میں۱۵؍اگست کی تقریبات کے احسن انعقاد کو یقینی بنانے کیلئے سیکورٹی کے کثیر سطحی انتظامات کئے گئے ہیں۔
بردی نے کہا کہ جس طرح کے سیکورٹی چلینجز درپیش ہیں ان کے مطابق بھر پور سیکورٹی انتظامات کئے گئے ہیں۔
آئی جی پی نے ان باتوں کا اظہار منگل کے روز یہاں بخشی اسٹیڈیم میں منعقدہ فل ڈرس ریہرسل تقریب کے حاشیہ پر نامہ نگاروں کے ساتھ بات کرنے کے دوران کیا۔
بردی نے کہا’’یوم آزادی آنے والا ہے ، اس ضمن میں وادی کے تمام اضلاع میں آج فل ڈرس ریہرسل تقریبات کا انعقاد ہوا‘‘۔ان کا کہنا تھا کہ۱۵؍اگست کی تقریبات کے احسن اور پر امن انعقاد کو یقینی بنانے کے لئے سیکورٹی کے کثیر سطحی انتظامات کئے گئے ہیں۔
آئی جی پی کشمیر نے کہا کہ ان تقریبات میں اہم ایونٹس اور ثقافتی پرگراموں کے انعقاد کیلئے سیکورٹی کا پختہ بند وبست کیا گیا ہے ۔انہوں نے کہا کہ جس طرح کے سیکورٹی چلینجز ہیں اسی طرح کے بھر پور سیکورٹی انتظامات کئے گئے ہیں۔
بردی کا کہنا تھا’’کوکرناگ میں آپریشن ابھی جاری ہے ، دشمن ناپاک کوششیں کرتا رہتا ہے سیکورٹی بندوبست بھی اسی کے حساب سے کیا جاتا ہے اور سیکورٹی فورسز چوک وچوبند ہیں‘‘۔
بتادیں کہ سرینگر کے بخشی اسٹیڈیم میں ہونے والی مین تقریب میں لیفٹیننٹ گورنر منوج سنہا قومی پرچم لہرائیں گے اور پریڈ کی سلامی لیں گے ۔