’دفعہ۳۷۰ ہمیشہ کیلئے دفن‘

جموں//
اطلاعات و نشرعات کے مرکزی وزیر انوراگ ٹھاکر نے ہفتے کے روز کہا کہ بھارتیہ جنتاپارٹی(بی جے پی) نے دفعہ۳۷۰کو ہمیشہ ہمیشہ کے لئے دفن کیا ہے ۔
ٹھاکر نے کہاکہ کشمیر میں علیحدگی پسندی اور دہشت گردی قصہ پارینہ بن چکے ہیں ۔
ان کے مطابق آج بغیر خوف کے لوگ لالچوک میں ترنگا لہرا رہے ہیں جو اس بات کی غماز ہے کہ کشمیر میں حالات یکسر تبدیل ہوگئے ہیں۔
ان باتوں کا اظہار ٹھاکر نے جموں میں انتخابی جلسے سے خطاب کے دوران کیا۔
مرکزی وزیر نے کہاکہ بھارتیہ جنتاپارٹی نے گزشتہ دس سالوں کے دوران ملک کو ترقی کی بلندیوں پر پہنچا دیا ۔
ٹھاکر نے کہا’’بی جے پی کی قیادت میں ملک اس وقت پانچویں بڑی معیشت کے طورپر ابھر کرسامنے آیا ہے ‘‘۔
مرکزی وزیر کے مطابق موجودہ مرکزی حکومت نے مضبوط بھارت کو یقینی بنانے کی خاطر زمینی سطح پر عملی اقدامات اٹھائیں اور آج پوری دنیا میں بھارت کا ڈنکا بج رہا ہے ۔
ٹھاکر نے کہاکہ تین خاندانوں نے جموں وکشمیر کو تباہی کی اور دھکیل دیا لیکن دفعہ ۳۷۰کی منسوخی کے بعد حالات بہتر ہوئے ہیں۔انہوں نے مزید بتایا کہ مودی جی نے دفعہ۳۷۰کو ہمیشہ ہمیشہ کیلئے ختم کیا اور اب یہ قانون واپس نہیں آئے گا۔
مرکزی وزیر برائے اطلاعات و نشرعات نے کہاکہ بھاجپا نے جموں وکشمیر میں خاندانی راج کو ختم کرنے کی خاطر قربانیاں دی ہیں۔انہوں نے کہا ’’کشمیر میں علیحدگی پسندی اور دہشت گردی کا خاتمہ ہو گیا ہے ‘‘۔
ٹھاکر کے مطابق گزشتہ دس برسوں کے دوران کشمیر میں بہت کچھ بدلا ہے ، علیحدگی پسندی اور دہشت گردی کا قلع قمع کیا گیا جبکہ تین خاندانوں سے بھی لوگوں کو چھٹکارا ملا ہے ۔انہوں نے کہا کہ آج سرینگر کے لالچوک میں بغیر کسی خوف اور ڈر کے لوگ ترنگا لہرا رہے ہیں۔
مرکزی وزیر نے کہاکہ جموں وکشمیر میں گزشتہ سال زائد از دو کروڑ سیاحوں نے سیاحتی مقامات کی سیر کی ۔
ٹھاکر کا کہنا تھا’’آج کے دور میں سری نگر میں فارمولہ ون کی گاڑیاں چل رہی ہیں، جی ٹونٹی کے کامیاب انعقاد سے جموں وکشمیر میں نئے دور کا آغاز ہوا‘‘ ۔
اپنی تقریر میں مرکزی نے مزید کہا کہ موجودہ حکومت نے والمیکی سماج اور گوجر وں کو انصاف فراہم کیا۔ ہم نے وہ کرکے دکھایا جو کانگریس نے ستر سالوں کے دوران نہیں کیا ۔