پولیس اور فوج کی مشترکہ میٹنگ‘سکیورٹی صورتحال کا جائزہ

جموں//
جموں وکشمیر کی تازہ سیکورٹی صورتحال کا جائزہ لینے کے لیے جموں میں فوج اورپولیس کے سینئر آفیسروں کی ایک مشترکہ جائزہ میٹنگ منعقد ہوئی۔
میٹنگ میں سیکورٹی صورتحال کا جائزہ لینے کے ساتھ ساتھ انسداد دراندازی اور انسداد دہشت گردی گرڈ کو مضبوط کرنے کی خاطر طریقہ کار پر غور کیا گیا۔
اطلاعات کے مطابق جموں میں پولیس سربراہ آر آر سوائن‘ جی او سی۱۶ویںکور‘لیفٹیننٹ جنرل نوین سچدیوا کی سربراہی میں ایک اعلیٰ سطحی میٹنگ منعقد ہوئی جس دوران جموں وکشمیر کے سیکورٹی منظر نامے کا جائزہ لیا گیا۔
پولیس کے ایک بیان کے مطابق میٹنگ کے دوران انسداد دراندازی گرڈ کو مضبوط کرنے کے طریقہ کار پر بھی غور کیا گیا۔
میٹنگ کے دوران جموں وکشمیر میں سرگرم ملی ٹینٹوں کے خلاف چلائے جارہے آپریشنز کے بارے میں سینئر آفیسران کو جانکاری فراہم کی گئی۔معلوم ہوا ہے کہ اعلیٰ سطحی میٹنگ کے دوران جموں و کشمیر کی سیکورٹی صورتحال کا از سر نو جائزہ لیا گیا۔
میٹنگ کے دوران فیصلہ لیا گیا کہ جموں وکشمیر میں سیکورٹی گرڈ کو مضبوط بنانے کے ساتھ ساتھ ہیومن انٹیلی جنس کو بھی فعال کیا جائے گا تاکہ سماج دشمن عناصر کے منصوبوں کو ناکام بنایا جاسکے۔
میٹنگ میں اے ڈی جی پی لا اینڈ آرڈر وجے کمار، اے ڈی جی پی جموں آنند جین ، اے ڈی جی پی سی آئی ڈی نتیش کمار، آئی جی بی ایس ایف ڈی کے بورا اور پولیس ، فوج ، سی آر پی ایف اور خفیہ ایجنسیوں کے سینئر عہدیداروں نے شرکت کی۔