کسانوں سے مودی کے وعدے جھوٹے نکلے : کھڑگے

نئی دہلی// کانگریس صدر ملکارجن کھڑگے نے کہا ہے کہ وزیر اعظم نریندر مودی نے کسانوں سے جو وعدے کیے تھے انہیں پورا نہ کر کے ملک کے کسانوں کو دھوکہ دیا ہے ۔
مسٹر کھڑگے نے جمعرات کو کہاکہ "16 سال پہلے کانگریس-یو پی اے حکومت نے 72,000 کروڑ روپے کے زرعی قرضے اور 3.73 کروڑ کسانوں کے سود کو معاف کیا تھا۔ یہ کانگریس کی ضمانت تھی جو پوری ہوئی۔ صرف کانگریس ہی اس کی ضمانت پوری کرتی ہے ۔”
مسٹر مودی پر کسانوں سے کئے گئے وعدوں کو پورا نہ کرنے کا الزام لگاتے ہوئے انہوں نے کہا کہ ‘‘مودی جی نے کسانوں سے دو بڑے وعدے کیے ، پہلا لاگت کا 50 فیصد اور اس کا ایم ایس پی، دوسرا 2022 تک کسانوں کی آمدنی دوگنی کرنا لیکن مودی جی کی دونوں ‘گارنٹی’ جعلی نکلی اور کسانوں کی حالت بدتر ہو گئی۔’’
انہوں نے کہاکہ "کانگریس نے کسانوں سے ایک بار پھر وعدہ کیا ہے کہ وہ 15 کروڑ کسان خاندانوں کو ایم ایس پی کی قانونی ضمانت دے گی۔ جے کسان جے ہندوستان۔”
دریں اثنا، پارٹی نے ٹویٹر پر اپنے آفیشل پیج پر بے روزگاری پر بھی حکومت پر حملہ کیا اور کہاکہ "ملک میں بے روزگاری کے بارے میں حقیقت جانیں۔’’
ہریانہ میں چپراسی کے 12 عہدوں پر بھرتی نکلی۔ ان 12 آسامیوں کے لیے 9000 سے زائد امیدواروں نے اپلائی کیا۔ بے روزگاری کی صورتحال اتنی سنگین ہے کہ چپراسی کی نوکریوں کے لیے درخواست دینے والوں میں سے بہت سے بی ٹیک اور ایم ٹیک ڈگری ہولڈرز ہیں۔ بی جے پی ملک کے نوجوانوں کی دشمن ہے کیونکہ نہ تو وہ نوکریاں دے پاتی ہے اور نہ ہی پیپرز کو لیک ہونے سے بچا پاتی ہے ۔ بی جے پی حکومتوں نے نوجوانوں کے مستقبل کو بے روزگاری کے اندھیروں میں پھینک دیا ہے ۔