روسی صدر کے ایک اور ناقد کو جیل بھیج دیا گیا

ماسکو//
روسی عدالت نے منگل کو روسی صدر ولادیمیر پوتن کے سخت ترین ناقد اولگ اورلوف کو ڈھائی سال قید کی سزا سنائی۔
بین الاقوامی خبر رساں ادارے کی رپورٹ کے مطابق عدالت کی جانب سے اولگ اورلوف کو ایک مضمون میں روسی فوج کو ”بدنام” کرنے پر ڈھائی سال قید کی سزا سنائی گئی۔ اولگ کے مطابق ان کے خلاف یہ کیس سیاسی بنیادوں پر بنایا گیا ہے۔روسی صدر کے مخالف 70 سالہ اولگ کو اپنے ایک مضمون کے حوالے سے قانونی کارروائی کا سامنا کرنا پڑ رہا تھا، جس پر انہوں نے یوکرین پر روسی حملے پر تنقید کی تھی۔
ایک عدالت نے روسی دارالحکومت ماسکو میں انہیں اس مضمون میں روسی فوج کو متعدد بار بدنام کرنے پر مجرم قرار دیتے ہوئے دو سال اور چھ ماہ قید کی سزا سنائی۔ اس فیصلے کے بعد حکام نے انہیں عدالت ہی میں حراست میں لے لیاتھا۔