سرینگر/26فروری
وزیر اعظم نریندر مودی مارچ کے مہینے میں کشمیر کا دورہ کریں گے جہاں وہ جنوبی ضلع اننت ناگ میں ایک عوامی ریلی سے خطاب کریں گے۔
باوثوق ذرائع نے خبر رساں ایجنسی کشمیر نیوز آبزرور (کے این او) کو بتایا کہ وزیر اعظم مودی 7 مارچ سے 15 مارچ کے درمیان کشمیر کا دورہ کریں گے۔ انہوں نے بتایا کہ وہ جنوبی کشمیر کے اننت ناگ ضلع میں ایک عوامی ریلی سے خطاب کریں گے۔
بی جے پی کے ایک رہنما نے کے این او کو بتایا کہ بی جے پی کی کشمیر اکائی وزیر اعظم پر زور دے رہی ہے کہ وہ سرینگر میں بھی ایک ریلی سے خطاب کریں۔ انہوں نے کہا کہ اس بارے میں کوئی حتمی فیصلہ نہیں ہوا ہے اور وزیر اعظم مودی 7 مارچ سے 15 مارچ کے درمیان کسی بھی وقت کشمیر پہنچیں گے۔ انہوں نے کہا کہ حتمی تاریخ کا اعلان جلد کیا جائے گا۔
20 فروری کے بعد سے وزیر اعظم مودی کا جموں و کشمیر کا یہ دوسرا دورہ ہوگا ، جس دن انہوں نے جموں میں ایک بڑی عوامی ریلی سے خطاب کیا تھا جہاں انہوں نے 32000 کروڑ روپے کے پروجیکٹوں کا افتتاح بھی کیا تھا۔
