نارکو ٹیرر فنڈنگ کیس: کپوارہ میں چار ملزموں کی جائیدادیں قرق

سرینگر //
قومی تحقیقاتی ایجنسی (این آئی اے) نے شمالی کشمیر کے ضلع کپوارہ کے ہندوارہ علاقے میں ایک نارکو ٹیرر فنڈنگ کیس کے سلسلے میں کالعدم جنگجو تنظیموں حزب المجاہدین اور لشکر طیبہ سے وابستہ۴ملزموں کی جائیدادوں اور۲۷ء۲کروڑ روپیوں کی نقدی رقم ضبط کر دی۔
ایجنسی کے ایک ترجمان نے اپنے ایک بیان میں کہا کہ این آئی اے نے کپوارہ کے ہندوارہ علاقے میں چار ملزموں کی جائیدادوں کو ضبط کیا اور اس کے علاوہ یو اے (پی) ایکٹ کی دفعہ۲۵کے تحت۲۷ء۲کروڑ رویے نقد بھی ضبط کئے۔
ترجمان نے کہا کہ منسلک شدہ جائیدادوں میں ملزم آفاق احمد کا دو منزلہ رہائشی مکان، ملزم منیر احمد پانڈے کا یک منزلہ مکان، سلیم اندرابی کا مکان اور اسلام الحق کا دو منزلہ مکان شامل ہے۔
بیان میں کہا گیا’’اس کیس کے سلسلے میں اب تک۱۲ ملزموں کی گرفتاری عمل میں لائی گئی ہے اور اس میں این آئی اے نے۱۵؍افراد کے خلاف چارج شیٹ دائر کی ہے‘‘۔انہوں نے مزید کہا’’یہ مقدمہ زیر نمبر آر سی۰۳/۲۰۲۰/ این ائی اے/ جموں ہندوارہ کپوارہ میں سرگرم لشکر طیبہ اور حزب المجاہدین کی طرف سے دہشت گردانہ سرگرمیوں کی فنڈنگ کے لئے نشہ آور ادویات سے حاصل شدہ آمدنی کے استعمال کے متعلق ہے‘‘۔
ترجمان نے کہا’’ہند وارہ کے لنگیٹ علاقے میں گاڑیوں کی چیکنگ کے دوران ایک کالے بیگ اور بڑی تعداد میں ہندوستانی کرنسی کے ۵۰۰ سو روپے کے نوٹوں کی بر آمدگی کے بعد یہ مقدمہ درج کیا گیا تھا‘‘۔انہوں نے کہا کہ یہ بر آمدگی ایک سفید کریٹا گاڑی جس کا نمبر پلیٹ نہیں تھا، سے کی گئی تھی۔
بیان میں کہا گیا’’گاڑی کے ڈرائیور عبدالمومن پیر سے ابتدائی پوچھ تاچھ کے دوران منشیات اور دہشت گردی کے گٹھ جوڑ کے بارے میں انکشاف ہوا تھا جس کے بعد این آئی اے نے وسیع پیمانے پر تحقیقات شروع کی تھی‘‘۔
این آئی اے ترجمان نے کہا’’تحقیقات کے دوران مختلف ملزموں کے گھروں سے ابتدائی تلاشی کے دوران۲۱ کلو ہیرائن بر آمد کی گئی تھی نیز قابل اعتراض مواد اور بھاری نقدی رقم بھی بر آمد کی گئی تھی‘‘۔
بیان میں کہا گیا کہ ایجنسی کشمیر میں ٹیرر نیٹ ورک کو تباہ کرنے اور قومی تحفظ کو یقینی بنانے کے لئے اپنی کاوشیں جاری رکھے گی۔