سرینگر//
وادی میں شدید خشک سالی جیسی صورتحال کے خاتمے کیلئے انجمن اوقاف جامع مسجد نے لوگوں سے کہا ہے کہ وہ مرکزی مسجد میں نماز استسقاء میں شامل ہو کر کشمیر میں بے مثال خشک سالی کے خاتمے کیلئے دعا کریں‘جس نے یہاں انتہائی تشویش ناک رخ اختیار کیا۔
انجمن اوقاف نے آج جاری کردہ ایک بیان میں اللہ تعالیٰ سے گناہوں کی معافی مانگنے کی ضرورت پر زور دیا اور لوگوںپر زور دیا کہ وہ توبہ کے اجتماعات میں شرکت کریں۔ انجمن کا خیال ہے کہ اس مشکل وقت میں اللہ کی طرف رجوع کرنا اور دعاؤں کے ذریعے اس کی مدد مانگنابہت ضروری ہے۔
اوقاف نے کہا کہ ایسی آزمائشوں کے وقت ہمیں اللہ کی طرف رجوع کرنا چاہیے اور دعاؤں کے ذریعے اس سے مدد مانگنی چاہیے اور اس سے درخواست کرنی چاہیے کہ وہ ہمیں اسلام کے راستے پر ثابت قدم رکھے تاکہ وہ ہمیں اس مشکل وقت سے نجات دلائے۔
انجمن اوقاف نے۱۲ جنوری کو سرینگر کی مرکزی جامع مسجد میں نماز جمعہ کے بعد صلاۃ الاستسقاء ادا کرنے کا اعلان کیا۔ تنظیم نے لوگوں سے اپیل کی کہ وہ توبہ اور استغفار کی دعا میں بڑھ چڑھ کر حصہ لیں۔
اوقاف نے زور دیا ’’ہم اجتماعی طور پر اور انفرادی طور پر بھی اللہ کے حضور اپنے گناہوں کی معافی مانگیں گے تاکہ اس کا فضل ہم پر نازل ہو اور وہ ہمیں اس مشکل موسمی صورتحال سے نجات دلانے میں مدد کرے‘‘۔
بیان میں تمام مساجد کے اماموں، علمائے کرام، مذہبی اداروں کے سربراہوں اور عام مسلم آبادی سے اپیل کی گئی ہے کہ وہ انفرادی اور اجتماعی دونوں سطحوں پر نماز استسقاء کا اہتمام کریں۔
