بلغاریہ کے پارلیمانی وفد کی لوک سبھا اسپیکر سے ملاقات

نئی دہلی// جمہوریہ بلغاریہ کی قومی اسمبلی کے صدر مسٹر روزن زیلیازکوف کی قیادت میں ہندوستان کے دورے پر آئے ہوئے پارلیمانی وفد نے لوک سبھا کے اسپیکر اوم برلا سے پارلیمنٹ ہاؤس کمپلیکس میں آج ملاقات کی۔ .
ہندوستان اور بلغاریہ کے درمیان پرانے اور مضبوط دوستانہ تعلقات کا ذکر کرتے ہوئے مسٹر برلا نے کہا کہ دونوں ملک جمہوریت، قانون کی حکمرانی، عوام پر مبنی حکمرانی اور شفافیت کی مشترکہ اقدار پر یقین رکھتے ہیں۔ انہوں نے اس بات پر خوشی کا اظہار کیا کہ دسمبر 2024 میں دونوں ممالک کے درمیان سفارتی تعلقات کے قیام کے 70 سال مکمل ہو رہے ہیں۔ لوک سبھا کے اسپیکر نے دونوں ممالک کے درمیان قریبی پارلیمانی تعلقات پر بات چیت کے دوران بلغاریہ کی قومی اسمبلی میں "فرینڈشپ گروپ فار انڈیا” کے قیام پر خوشی کا اظہار کیا۔ انہوں نے امید ظاہر کی کہ یہ گروپ دونوں ممالک کے درمیان دوطرفہ تعلقات کو مزید مضبوط بنانے میں فعال کردار ادا کرے گا۔ مسٹر برلا نے وفد کو بتایا کہ ہندوستان کی پارلیمنٹ میں ایک "فرینڈشپ گروپ” بھی تشکیل دیا گیا ہے ۔
وزیر اعظم نریندر مودی کی دور اندیش قیادت میں دنیا میں ہندوستان کے بڑھتے ہوئے قد کا حوالہ دیتے ہوئے لوک سبھا اسپیکر نے کہا کہ ہندوستان سماجی و اقتصادی تبدیلی کے ایک مرحلے سے گزر رہا ہے ۔ انہوں نے کہا کہ پی ایم مودی کی قیادت میں مضبوط اور مستحکم حکومت کی وجہ سے ہندوستان عالمی مسائل کا حل فراہم کر رہا ہے اور عالمی ایجنڈا ترتیب دے رہا ہے ۔ جی 20 میں ہندوستان کی قیادت کے بارے میں انہوں نے کہا کہ سربراہی اجلاس کے دوران ہندوستان اپنی جمہوری اقدار کی بنیاد پر، عالمی ایجنڈا طے کرنے اور کئی اہم اور متنازعہ مسائل پر اتفاق رائے پیدا کرنے میں کامیاب رہا۔
ہندوستان کی جمہوری وراثت کا ذکر کرتے ہوئے مسٹر برلا نے کہا کہ آزادی کے 75 برسوں میں ہندوستانی جمہوریت مضبوط ہوئی ہے اور اس کی جڑیں گہری ہو چکی ہیں۔ انہوں نے دونوں ممالک کی مشترکہ اقدار کا ذکر کرتے ہوئے کہا کہ جمہوریت کی طاقت سے آج دونوں ملک ترقی اور خوشحالی کی راہ پر تیزی سے آگے بڑھ رہے ہیں۔