سعودی حکام نے 43 کلو منشیات سمگل کرنے کی کوشش ناکام بنا دی

الریاض//
سعودی حکام نے جرائم پیشہ عناصر کے خلاف اپنی کارروائیاں جاری رکھتے ہوئے پیر کے روز سمگلروں کی طرف سے 43 کلو گرام میتھم فیٹا مائن نامی منشیات سمگل کرنے کی کوشش ناکام بنادی ہے۔ حکام نے کامیاب کارروائی کر کے منشیات بھی قبضے میں لے لی ہے۔
بتایا گیا ہے کہ سمگلروں نے بڑی ہوشیاری سے منشیات کو گاڑی کے فیول ٹینک میں چھپا رکھا تھا، تاہم اس مشکوک گاڑی کو حکام نے اس وقت روک لیا جب یہ مملکت میں رب الخیلی اور زکات پورٹ سے داخل ہورہی تھی۔ اسے ٹیکس اینڈ کسٹم حکام نے روک لیا۔
اس موقع پر تلاشی کے عمل کے دوران انسداد منشیات کے ادارے جنرل ڈائریکٹوریٹ آف نارکاٹکس کنٹرول نے منشیات برآمد کر لی۔اسی دوران جازان کے علاقے میں بھی ایک کارروائی کے دوران سمتہ گورنری میں ایک شخص کو ایمفیٹامائن کی تقسیم میں ملوث شخص کو بھی گرفتار کر لیا گیا ہے۔ بعد ازاں مقدمہ پراسیکیوٹر کے حوالے کر دیا گیا ہے۔جیزان کے ایک اور علاقے الدیر میں سرحدی محافطوں نے گشت کے دوران 240 کلو قات سمگل کرنے کے الزام کے تحت 2 یمن اور 5 ایتھوپیا کے شہریوں کو حراست میں لے لیا ہے۔
ادھر جدہ میں دو مصری منشیات فروشوں کو گرفتارکر لیا گیا ہے۔ ان پر حشیش فروخت کرنے کا الزام عائد کیا گیا ہے۔ ان سے دس کلو گرام حشیش برآمد کی گئی ہے۔
علاوہ ازیں 16875 کی تعداد میں منشیات کی بنی گولیاں طبی مقاصد کے لیے بنا کر پھیلانے کی کوشش کے دوران قبضے میں لی گئی ہیں۔ کئی مزید جگہوں پر بھی کارروائیاں کر کے منشیات برآمد کی گئی ہے۔