بفلیاز حملے کو نظر انداز نہیں کیا جاسکتا:مرکزی وزیر جتیندر سنگھ

جموں//
وزیر اعظم دفتر میں تعینات مرکزی وزیر ڈاکٹرجتیندر سنگھ نے ہفتے کے روز کہاکہ مودی نے دفعہ۳۷۰ہٹا کر ادھورے کام کو پورا کیاہے۔
سنگھ نے کہاکہ راجوری حملے کو نظر انداز نہیں کیا جاسکتا۔ ایجنسیاں اس معاملے پر کام کررہی ہیں۔
ان باتوں کا اظہار مرکزی وزیر مملکت نے کٹھوعہ میں نامہ نگاروں سے بات چیت کے دوران کیا۔
سنگھ نے کہاکہ دفعہ ۳۷۰کی منسوخی کا فیصلہ غیر معمولی اہمیت کا حامل ہے کیونکہ موجودہ وزیر اعظم نریندر مودی نے ایک ادھورے کام کوپورا کیا ہے۔ان کے مطابق اس قانون کو منسوخ کرکے مودی نے جموںکشمیر کے لوگوں پر بہت بڑا احسان کیا۔
مرکزی وزیر نے مزید بتایا کہ اس قانون کے ہوتے ہوئے لوگوں کے ساتھ نا انصافی ہو رہی تھی۔
راجوری کے بفلیاز میں دہشت گرد حملے کے بارے میں پوچھے گئے سوال کے جواب میں مرکزی وزیر نے کہا’’راجوری حملے کونظر انداز نہیں کیا جاسکتا ، ایجنسیاں اس معاملے پر کام کررہی ہیں۔‘‘
سنگھ نے کہاکہ جموں وکشمیر میں حالات کو پوری طرح سے معمول پر لانے کی خاطر سیکورٹی ایجنسیاں زمینی سطح پر کام کر رہی ہیں۔