سرینگر//
انفورسمنٹ ڈائریکٹورٹ(ای ڈی) نے۲۵۰کروڑ روپیوں کے بینک منی لانڈرنگ کیس کے سلسلے میں کوآ پریٹوبینک کے سابق چیئرمین اور فرضی جہلم کوآپریٹوہاوسنگ سوسائٹی کے چیئرمین کی گرفتاری عمل میں لائی ہے۔
ذرائع نے بتایا کہ انفورسمنٹ ڈائریکٹوریٹ (ای ڈی) نے منی لانڈرنگ کیس میں سابق کوآپریٹو بینک چیئرمین محمد شفیع ڈار اور جہلم کوآپریٹو ہاوسنگ سوسائٹی کے چیئرمین ہلال میر کو گرفتار کیا۔
بتادیں کہ ای ڈی نے جمعرات کے روز۲۵۰کروڑ روپے منی لانڈرنگ کیس کے سلسلے میں سابق چیئرمین سمیت چھ مقامات پر چھاپے مارے۔
واضح رہے کہ اینٹی کرپشن بیورو کی جانچ میں یہ منکشف ہوا کہ کوآپریٹو بینک نے قواعد و ضوابط کو بالائی طاق رکھ کر۲۲۳کروڑ روپے کا قرضہ جہلم کوآپریٹو ہاوسنگ سوسائٹی کے نام منظور کیا۔
اس دوران سوسائٹی کی بیلنس شیٹ ، منافع اور نقصان ، انکم ٹیکس ریٹرن کے بارے میں کوئی جانکاری حاصل نہیں کی گئی۔انکوائری میں انکشاف ہوا کہ جہلم کوآپریٹو ہاوسنگ سوسائٹی‘راجسٹرار کوآپریٹو سوسائٹیز کے پاس بھی رجسٹر نہیں تھی۔
سابق چیئرمین نے ہلال میر کے ساتھ مل کر سوسائٹی کے نام پر جعلی اور فرضی رجسٹریشن سرٹیفکیٹ تیار کی اوربعد ازاں سوسائٹی کے نام پر بھاری لون منظور کر لیا۔
