’پی او کے کیلئے جنگ کی ضرورت نہیں‘ خود ہی مل جائے گا ‘

سرینگر//
وزیر دفاع راجناتھ سنگھ نے کہا ہے کہ مقبوضہ کشمیر(پی او کے) کیلئے جنگ کی ضرورت نہیں ‘وہ خود ہی مل جائے گا ‘‘۔
سنگھ نے ایک میڈیا چینل سے خصوصی بات چیت کے دوران کہا کہ پاکستان مقبوضہ کشمیر (پی او کے) پر حملے کی کوئی ضرورت نہیں ہے اور نہ ہمیں جنگ چھیڑنے کی ضرورت ہے کیوں کہ وہ خطہ خود ہی ہندوستان میں شامل ہونے کی طرف بڑھ رہا ہے۔
وزیر دفاع نے یہ بھی کہا کہ انھوں نے اس تعلق سے ایک سال پہلے ہی پیش گوئی کر دی تھی کہ مقبوضہ کشمیر بہت جلد ہندوستان میں شامل ہو جائے گا۔
سنگھ نے ’ٹی وی نائن بھارت وَرش‘ سے بات چیت کے دوران کہا کہ ہم نے سال بھر پہلے سری نگر میں جا کر کہا تھا کہ پاکستان پر حملہ یا پی او کے پر قبضہ کرنے کی کوئی ضرورت نہیں ہے۔ پی او کے خود (ہندوستان میں ملنے کا) مطالبہ کرے گا۔ آج دیکھیے وہاں سے کتنا تیز مطالبہ ہو رہا ہے۔
وزیر دفاع نے کہا’’۷۰سے ۷۵سال پہلے تو ہمارے ساتھ ہی تھا اور ہمیں یہ یقین ہے کہ وہ دوبارہ ہم سے مل جائے گا۔ آج وہاں انضمام کا مطالبہ تیز ہو رہا ہے۔‘‘
وزیر دفاع نے کہا کہ ہندوستان کو پاک مقبوضہ کشمیر سے متعلق کچھ کرنے کی ضرورت نہیں ہے۔ جس طرح سے پاکستان حکومت اس خطے کو نظر انداز کر رہی ہے، اس سے خود بخود ایسا ماحول بن رہا ہے کہ وہ ہندوستان کے ساتھ ضم ہو جائے۔ لیکن’’ میں واضح کر دینا چاہتا ہوں کہ ہم کسی خاص علاقہ پر قبضہ کر کے اس کو حاصل کرنے کی منشا نہیں رکھتے ہیں‘‘۔
سنگھ کے مطابق ہم امن چاہتے ہیں اور ہمیشہ امن کے ساتھ رہے ہیں لیکن اگر کوئی سامنے سے حملہ کرے یا ہماری سالمیت کو نقصان پہنچانے کی کوشش کرے تو ہم برداشت نہیں کریں گے۔