امریکی پاکستان نہیں ہندوستان کو اپنا دوست سمجھتے ہیں

اسلام آباد//
ایک سروے میں یہ بات سامنے آئی ہے کہ امریکہ کے زیادہ تر لوگ پاکستان کے مقابلے ہندوستان کو اپنا سب سے قریبی دوست مانتے ہیں۔
میڈیا رپورٹس کے مطابق گیلپ پاکستان نے یہ سروے امریکی ایجنسیوں کے ساتھ مل کر کیا ہے جس میں ایک ہزار کے قریب امریکیوں نے اپنی رائے کا اظہار کیا۔
سروے میں۵۶فیصد امریکیوں نے ہندوستان کو اپنا دوست جبکہ۲۸فیصد نے پاکستان کو اپنا دوست قرار دیا۔اس کے برعکس۳۹فیصدامریکی پاکستان کو اپنا دشمن سمجھتے ہیں جبکہ صرف۱۱فیصد نے ہندوستان کو اپنا دشمن سمجھا۔
سروے میں یہ حقیقت بھی سامنے آئی کہ۳۴ فیصد امریکی پاکستان کو منفی طور پر دیکھتے ہیں جب کہ۳۲فیصد ہندوستان کے بارے میں کوئی رائے ظاہر کرنے سے گریز کرتے ہیں۔
سروے میں کہا گیا ہے کہ ہندوستان کو اپنا دوست سمجھنے والے امریکیوں کی شرح سفید فام امریکیوں میں ۶۳فیصد زیادہ ہے جب کہ اسی گروپ میں سے۲۶فیصد پاکستان کو اپنا دوست مانتے ہیں۔ دیگر امریکی گروپوں میں سے۴۳فیصد ہندوستان کو اپنا دوست سمجھتے ہیں جبکہ ۳۲فیصد پاکستان کو اپنا دوست سمجھتے ہیں۔
عمر کے لحاظ سے۵۰سال سے زیادہ عمر کے۶۱فیصد امریکیوں نے ہندوستان کی حمایت کی، جبکہ اسی عمر کے۲۳فیصد امریکیوں نے پاکستان کی حمایت کا اظہار کیا۔