دھند میں باہر نکلنے والے بچے اور بزرگ ماسک لگائیں:احمد

سرینگر//
ڈائریکٹرمحکمہ موسمیات سرینگر‘ مختار احمد نے صبح کے وقت دھند میں باہر نکلنے والے بچوں اور بزرگوں کو احتیاطی طور پر ماسک لگانے کی تاکید کی ہے ۔
احمد نے کہا کہ سرینگر میں۲۷نومبر تک دھند چھائی رہنے کا سلسلہ جاری رہ سکتا ہے اور اس دوران سردی میں بھی اضافہ ہی متوقع ہے ۔
بتادیں کہ سری نگر میں گذشتہ چند روز سے صبح کے وقت گہری دھند چھائی رہنے کا سلسلہ جاری ہے اور شہر کئی علاقوں میں منگل کی صبح بھی دھند چھائی رہی۔
دھند چھائی رہنے سے جہاں سری نگر ہوائی اڈے پر صبح کے وقت کم سے کم تین پروازوں کو تاخیر ہوئی وہیں زمینی ٹرانسپورٹ کی نقل و حمل بھی قدرے متاثر ہوئی۔
ڈائریکٹر نے اس سلسلے میں بتایا کہ سری نگر میں ۲۷نومبر تک دھند چھائی رہنے کا سلسلہ جاری رہنے کا امکان ہے اور اس دوران کچھ علاقوں میں گہری دھند چھائی رہ سکتی ہے ۔انہوں نے کہا’’بچے اور بزرگ جن کو اس دھند میں باہر نکلنا پڑتا ہے ، کو چاہئے کہ وہ احتیاطی طور پر ماسک لگا کر باہر نکلیں‘‘۔ان کا مزید کہنا تھا کہ ڈرائیور حضرات کو بھی چاہئے کہ وہ گاڑیاں چلاتے وقت احتیاط برتیں کیونکہ صبح اور شام کے وقت روشنی کم ہوتی ہے ۔
احمد نے کہا کہ وادی میں آنے والے دنوں میں سردی میں اضافہ درج ہوسکتا ہے ۔انہوں نے کہا کہ وادی میں فی الوقت درجہ حرارت میں بھی بہتری واقع ہونے کا کوئی امکان نہیں ہے ۔