محبوبہ مفتی پی ڈی پی کی دوبارہ صدر منتخب

سرینگر//
سابق وزیر اعلیٰ‘ محبوبہ مفتی کو جمعرات کے روز پیپلز ڈیموکریٹک پارٹی (پی ڈی پی) کا تین برسوں کیلئے دو بارہ صدر منتخب کیا گیا۔
پارٹی کے نائب صدر اور سینئر لیڈر عبدالرحمان ویری نے صدر کے عہدے کے لئے محبوبہ مفتی کا نام تجویز کیا تھا اور غلام نبی ہانجورہ نے اس کی تائید کی تھی۔
پی ڈی پی کے ترجمان نے’ایکس‘پر ایک پوسٹ میں کہا’’نائب صدر اے آر ویری نے محبوبہ مفتی کا صدر کے عہدے کیلئے نام تجویز کیا جس جی این ہانجوری نے تائید کی‘‘۔
پارٹی صدر کے عہدے کیلئے یہاں پارٹی ہیڈ کوارٹر پر’وائس ووٹ‘کے ذریعے انتخابی عمل انجام دیا گیا۔
دریں اثنا پارٹی کے لیڈروں اور کارکنوں نے محبوبہ مفتی کو دوبارہ صدر منتخب ہونے پر مبارک باد پیش کی ہے ۔
محبوبہ مفتی کے والد مفتی محمد سعید نے کانگریس سے کنارہ کشی اختیار کرکے سال۱۹۹۹میں پی ڈی پی کو معرض وجود میں لایا تھا۔پی ڈی پی نے پہلی بار سال۲۰۰۳میں کانگریس کت ساتھ مل کر سرکار بنائی جبکہ بعد ازاں یہ پارٹی بی جے پی کے ساتھ مل کر بر سر اقتدار آئی۔
مرکزی حکومت کے پانچ اگست۲۰۱۹کے فیصلوں کے بعد کئی بانی لیڈروں نے اس پارٹی سے ناطہ توڑ دیا۔