بالائی علاقوں میں برفباری ‘ میدانی علاقوں میں تیز ہوائیں‘بارشیں

سرینگر//
وادی میں پیر کی شام کو پہاڑی علاقوں میں برف و باراں اور میدانی علاقوں میں بارشوں کا سلسلہ شروع ہوا جس کے نتیجے میں درجہ حرارت میں بتدریج کمی واقع ہوئی ہے ۔
تفصیلات کے مطابق پیر کی سہ پہر کو سرینگر اور وادی کے کچھ دوسرے میداونی علاقوں ‘جہاں بعد از دوپہر تک دھوپ تھی‘ مطلع ابر آلود ہوا اور ہوائیں بھی چلنے لگی جس کے ساتھ ہی موسلادھار بارشیں بھی شروع ہوئیں ۔
بارشوں کا سلسلہ رک رک کر شام تک جاری رہا جس سے درجہ حرارت میں مزید گراوٹ درج کی گئی ۔ ہواؤں کی وجہ سے سرینگر کے کچھ حصوں میں بجلی سپلائی بھی متاثر ہو ئی ۔
ا دھرپیر کی شام پہاڑی علاقوں بشمول سیاحتی مقامات پر تازہ برفباری کی اطلاعات ہیں۔نامہ نگار نے بتایا کہ زوجیلا پر تین انچ برف ریکارڈ ہوئی جبکہ سیاحتی مقامات گلمرگ ، سونہ مرگ اور پہلگام کے اوپری پہاڑیوں پر بھی تازہ برف باری ہوئی ہے ۔
ماہر موسمیا ت فیضان عارف نے یواین آئی اردو کو بتایا کہ مغربی ہوائیں وادی کشمیر کی پہاڑیوں سے ٹکرانے کے ساتھ ہی سہ پہر کے بعد موسم تبدیل ہوا۔
عارف نے بتایا کہ گلمرگ کے افروٹ، سونہ مرگ ، زوجیلا، سم تھن ٹاپ ، سادھنا ٹاپ پر تازہ برف باری ریکارڈ کی گئی ۔انہوں نے مزید بتایا کہ سادھنا ٹاپ پر پیر کی سہ پہر سے ہی برف و باراں کا سلسلہ شروع ہوا تھا۔
ان کے مطابق کئی گھنٹوں تک ہی میدانی علاقوں میں بارشیں اور پہاڑی علاقوں میں برف و باراں جاری رہے گی اور اس کے بعد موسم میں بہتری واقع آنا شروع ہو جائے گی۔
ماہر موسمیات نے بتایا کہ ۱۴؍اکتوبر سے موسم کا مزاج پھر بدلے گا جس دوران پہاڑی علاقوں میں برف و باراں متوقع ہے ۔