ہر سال کی طرح امسال بھی یوم آزادی کو امن و آشتی سے منایا جائے گا:یادو

سرینگر//
سینٹرل ریزرو پولیس فورس (سی آر پی ایف) سرینگر کے انسپکٹر جنرل‘ اجے کمار یادو کا کہنا ہے کہ کشمیر میں یوم آزادی کی تقریبات کے پر امن انعقاد کو یقینی بنانے کیلئے بھر پور انتظامات کئے گئے ہیں۔
یادو نے کہا کہ ہر سال کی طرح امسال بھی یوم آزادی کی تقریبات کو امن و آشتی سے منایا جائے گا۔
سی آر پی ایف کے آئی جی نے ان باتوں کا اظہار جمعرات کو یہاں مائسمہ میں ایک تقریب کے حاشیہ پر نامہ نگاروں کے ساتھ کیا۔انہوں نے کہا’’یوم آزادی کی تقریبات کے پر امن انعقاد کو یقینی بنانے کیلئے بھر پور بندوبست کیا گیا ہے ‘‘۔
یادو کا کہنا تھا’’ہر سال کی طرح امسال بھی یوم آزادی کی تقریبات کو امن و آشتی سے منایا جائے گا‘‘۔انہوں نے کہا کہ سرینگر میں کئی مقامات پر خصوصی ناکے لگا دئے گئے ہیں۔
آئی جی نے کہا کہ سی آر پی ایف کا ہمیشہ سے ایک اہم رول رہا ہے اور آگے بھی رہے گا۔ ’’ہم نے ہمیشہ سول انتظامیہ اور پولیس کو مدد فراہم کی ہے‘‘ ۔ان کا کہنا تھا کہ فورسز کسی بھی چیلنج کا مقابلہ کرنے کیلئے تیار ہے ۔
یادونے کہا کہ آج یہاں مفت میڈیکل کیمپ کا انعقاد کیا گیا جس دوران لوگوں کا مفت علاج کیا گیا۔انہوں نے کہا کہ اگر کسی مریض کو خصوصی علاج کی ضرورت ہوگی تو سی آر پی ایف اس کو یقینی بنانے میں بھر پور مدد فراہم کرے گی۔