مجھے مجبور ہو کر گھر سے دفتر پیدل چلنا پڑا:عمر عبداللہ

سرینگر//
نیشنل کانفرنس کے نائب صدر اور سابق وزیر اعلیٰ‘ عمر عبداللہ کا کہنا ہے کہ انہیں مجبور ہو کر اپنی رہائش گاہ سے پیدل چل کر اپنے دفتر پہنچنا پڑا۔
عمرعبداللہ نے کہا’’میری سیکورٹی کو نکلنے کی اجازت نہیں دی گئی مقصد ان کا یہی تھا کہ میں۱۳جولائی کے شہیدوں کو خراج عقیدت پیش نہ کر سکوں‘‘۔
ان کا کہنا تھا’’میں دفتر پہنچا اگر میرے ساتھ بار بار یہی کیا گیا تو مجھے بھی یہی حربے کرنے پڑیں گے ‘‘۔
سابق وزیر اعلیٰ نے ان باتوں کا اظہار جمعرات کو یہاں نامہ نگاروں کے سوالوں کے جواب دینے کے دوران کیا۔انہوں نے کہا’’میرا پیدل چلنے کا کوئی ارادہ نہیں تھا میں ہمیشہ کی طرح آرام سے دفتر کے لئے گاڑی میں بیٹھا میرا ڈراما کرنے کا کوئی شوق نہیں ہے ‘‘۔
عمرعبداللہ کا کہنا تھا’’لیکن ان لوگوں نے مجھے گھر سے دفتر پیدل چلنے پر مجبور کیا کیونکہ ان لوگوں نے میری ساری گاڑیاں روکیں‘میری سیکورٹی کو نکلنے کی اجازت نہیں دی مقصد ان کا یہ تھا کہ میں ۳۱لائی کے شہیدوں کو خراج عقیدت پیش نہ کر سکوں‘‘۔
سابق وزیر اعلیٰ نے کہا کہ میں دفتر پیدل پہنچ گیا اور اگر میرے ساتھ بار بار یہی کیا گیا تو مجھے بھی یہی حربے کرنے پڑیں گے ۔
۳۱ جولائی کی سرکاری چھٹی منسوخ کرنے کے بارے میں پوچھے جانے پر انہوں نے کہا’’حکومتیں بدلتی رہتی ہیں، وقت بدلتا رہتا ہے آج چھٹی منسوخ کی گئی یہ دور بھی بدلے گا نئی حکومت جب آئی گی تو وہ بھی کسی چھٹی کو منسوخ کرے گی دوسری چھٹی رکھے گی‘‘۔
حالات نارمل ہونے کے بارے میں بات کرتے ہوئے ان کا کہنا تھا’’یہاں حالات نارمل نہیں ہیں میں تب مانو گا کہ یہاں حالات نارمل ہیں جب ہمارے لیفٹیننٹ گورنر صاحب راج بھون سے ہوائی اڈے تک ٹریفک کو روکے بغیر پہنچ جائیں گے ‘‘۔
این سی نائب صدر نے کہا کہ ہمارے ایل جی کی خالی گاڑی کیلئے بھی یہاں ٹریفک روکا جاتا ہے ۔
ایک سوال جواب میں ان کا کہنا تھا’’ہندوستان کی تاریخ بدلنے کی کوشش کی جا رہی ہے تو جموں وکشمیر کی تاریخ بدلنے کی کوشش کیوں نہیں کی جائے گی‘‘۔
عمر عبداللہ نے اپنے ایک ٹویٹ میں کہا کہ ان کی پارٹی کے کئی لیڈروں کو سری نگر میں واقع دفتر پہنچنے کی اجازت نہیں دی گئی۔
بتادیں کہ نیشنل کانفرنس نے جمعرات کو’یوم شہدا‘پر شہیدوں کو خراج عقیدت پیش کرنے کیلئے اپنے پارٹی ہیڈ کوارٹر پر ایک تقریب کا اہتمام کیا تھا۔
جموں وکشمیر میں۱۳جولائی کو سرکاری چھٹی ہوتی تھی جس کو۵؍اگست۲۰۱۹میں دفعہ۳۷۰کی تنسیخ کے بعد منسوخ کیا گیا۔