رام بن میں ڈبل لین والا وائیا ڈکٹ مکمل ‘وزیر اعظم کا شکریہ :سنہا

سرینگر//
۰۸ء۱ کلومیٹر طویل ڈبل لین والا رامبن وائیاڈکٹ مکمل ہو گیا ہے۔
سرینگر جموں قومی شاہراہ کے ادھم پور۔رامبن سیکشن پر۱۴۰ کروڑ روپے کی لاگت سے تعمیر کیا گیا وائیاڈکٹ گاڑیوں کی آسانی سے نقل و حرکت کو یقینی بنائے گا اور رامبن بازار میں بھیڑ کو دور کرے گا۔ اس ۲۶ اسپین وائیاڈکٹ کی تعمیر میں کنکریٹ اور اسٹیل گرڈرز کا استعمال کرتے ہوئے مختلف ساختی انتظامات شامل ہیں۔ یہ جموں سری نگر قومی شاہراہ پر شری امرناتھ جی یاترا کے دوران گاڑیوں اور یاتریوں کی ٹریفک کے بغیر کسی رکاوٹ کے گزرنے میں بھی سہولت فراہم کرے گا۔
مزید برآں، اس ڈھانچے کے متوازی چلنے والا ایک اور ٹولین وائیاڈکٹ، تکمیل کے قریب ہے اور اسے جلد ہی کھول دیا جائے گا۔
لیفٹیننٹ گورنر منوج سنہا نے جموں کشمیر کے یو ٹی میں شاہراہوں اور سڑک کے بنیادی ڈھانچے کی بے مثال ترقی کے لیے وزیر اعظم ‘نریندر مودی اور روڈ ٹرانسپورٹ اور ہائی ویز کے مرکزی وزیر جناب نتن گڈکری کا شکریہ ادا کیا۔
ایک ٹویٹ میں، لیفٹیننٹ گورنر نے کہا’’جموں و کشمیر میں شاہراہوں اور بنیادی ڈھانچے کی بے مثال ترقی اور پراجکٹس کی تکمیل کے لیے عزت مآب وزیر اعظم جناب نریندر مودی جی اور روڈ ٹرانسپورٹ اور ہائی ویز کے وزیر جناب نتن گڈکری جی کا مشکور ہوں۔‘‘
سنہا نے ٹویٹ میں مزید کہا’’محترم وزیر اعظم جناب نریندرمودی جی کی قیادت میں، جموں کشمیر اپنی عظمت کو دوبارہ حاصل کر رہا ہے۔ مرکز کے زیر انتظام علاقہ پہلے سے زیادہ مضبوط ہے اور اس نے سماجی و اقتصادی ترقی کے لیے متاثر کن پیش قدمی کی ہے ۔‘‘