تلنگانہ میں کانگریس سے اتحاد نہ کرنے بی ایس پی کا اعلان

حیدرآباد//تلنگانہ بی ایس پی نے اعلان کیا ہے کہ جاریہ سال کے اواخر میں ہونے والے ریاستی اسمبلی کے انتخابات کے سلسلہ میں کانگریس پارٹی سے اتحاد نہیں کیاجائے گا۔پارٹی کے ریاستی صدر آر ایس پروین کمار نے کہا کہ ان کی پارٹی ان جماعتوں کے ساتھ مل کر کام کرے گی جو بہوجن کو وزیر اعلیٰ کا امیدوارقراردے ۔ انہوں نے بھونگیر میں منعقدہ پارٹی کے جائزہ اجلاس میں شرکت کی۔ انہوں نے اس موقع پر تنقید کرتے ہوئے کہا کہ بی جے پی اور بی آرایس دو نوں ایک ہی پارٹی ہے ۔ اگر بی جے پی سنجیدہ ہے تواس نے شراب گھوٹالے میں بی آرایس کی رکن کونسل کویتا کو کیوں گرفتارنہیں کیا۔ انہوں نے کہاکہ تلنگانہ میں کسی بھی سماجی طبقہ کے ساتھ انصاف نہیں کیاگیا۔انہوں نے کہاکہ کالیشورم، مشن بھاگیرتا کے گھپلے پر ای ڈی کیوں خاموش ہے ؟