کرکٹ کے الیکشن میں اندھا پیسہ چلتا ہے: راشد لطیف کا الزام

لاہور//پاکستانی قومی ٹیم کے سابق کپتان راشد لطیف نے الزام لگایا ہے کہ کرکٹ کے الیکشن میں اندھا پیسہ چلتا ہے۔
اے آر وائی نیوز کے مطابق سابق کپتان راشد لطیف نے الزام لگایا کہ عام انتخابات میں کچھ نہیں ہوتا جو کرکٹ الیکشن میں ہوتا ہے، کرکٹ کے الیکشن میں اندھا پیسہ چلتا ہے۔
انہوں نے کہا کہ نچلی سطح پر الیکشن اور اوپر سلیکشن ہوتا ہے۔انہوں نے کہا کہ سب کو کرکٹ ہی میں کیوں آنا ہے سوچنے والی بات ہے، ہر کسی کو چیئرمین پی سی بی کی کرسی چاہیے۔انہوں نے کہا کہ چیئرمین پی سی بی کیلئے جو 2 نام دیے ان کا سلیکشن ہوا ہے ،پاکستان میں کرکٹ کے سسٹم کو درست کرناپڑے گا۔
راشد لطیف کا کہنا تھا کہ نچلی سطح پر بھی ڈمی الیکشن ہوتے ہیں، ان الیکشن میں کبھی کوئی کرکٹر منتخب نہیں ہوتا، پی سی بی کے گورننگ بورڈ میں بھی کرکٹر نہیں ہوتے، بورڈ میں کرکٹ کے فیصلے وہ کرتے ہیں جن کا کرکٹ سے تعلق نہیں ہوتا۔
انہوں نے مزید کہا کہ بی او جی میں ادارے کا نمائندہ ہو ں لیکن وہ اس ادارے کا کرکٹر ہونا چاہیے، ہندوستان میں گنگولی بنگال کا اور انیل کمبلے کرناٹک کا ذمہ دار بنتا ہے، پاکستان میں کرکٹرز کو آگے نہیں لایا جاتا، سب کو چیئرمین پی سی بی کی کرسی چاہیے، دیگر کھیلوں کی طرف کیوں نہیں جاتے۔