جموں کشمیر:فوج نے سنتھن پاس پر بھاری برف باری میں پھنسے۱۶؍افراد کو بچا لیا

سرینگر/۲۲؍اپریل
فوج نے جموں وکشمیر کے ضلع کشتواڑ میں سنتھن پاس پر بھاری برف باری میں پھنسے۱۶؍افراد کو نکال کر بچا لیا ہے ۔
فوج کے ایک ترجمان نے اپنے ایک بیان میں کہا کہ فوج کو سول انتظامیہ کی طرف سے جمعرات کو اطلاع موصول ہوئی کہ بھاری برف باری کے بیچ۱۶؍افراد سنتھن پاس کے نزدیک کہیں پھنسے ہوئے ہیں۔
ترجمان نے کہا کہ اطلاع موصول ہوتے ہی پھنسنے والے لوگوں کو بچانے کے لئے فوج کی ایک ٹیم سنتھن میدان سے سنتھن پاس کی طرف روانہ ہوگئی۔
بیان میں کہا گیا کہ فوج کی ٹیم نے این ایچ ۲۴۴پر کم روشنی اور مسلسل برف باری کے بیچ۱۵کلو میٹر کی مسافت طے کی اور بالآخر شام کے قریب سوا چھ بجے پھنسے ہوئے لوگوں کے پاس پہنچی۔
ترجمان نے کہا کہ ان لوگوں کو سنتھن پاس سے نیچے لاکر سنتھن میدان میں پہنچایا گیا جہاں ان کو پناہ، دوا اور غذا فراہم کیا گیا۔انہوں نے کہا کہ فوج کی بر وقت کارروائی سے قیمتی جانوں کو بچالیا گیا۔
دریں اثنا لوگوں نے فوج کی اس کارروائی کی سراہا کی ہے ۔