امر ناتھ یاترا:۳۰۰؍اضافی کمپنیوں کی تعیناتی ہو گی

سرینگر//
مرکزی وزارت داخلہ (ایم ایچ اے) اس ہفتے شری امرناتھ جی یاترا کے انتظامات کا اعلیٰ سطحی جائزہ لے گی جس میں پولیس اور سول انتظامیہ کے اعلیٰ افسران خاص طور پر یاترا کیلئے نیم فوجی دستوں کی اضافی تعیناتی کریں گے۔
ایک میڈیا رپورٹ کے مطابق جموں کشمیر پولیس شری امرناتھ جی کی سالانہ یاترا کیلئے اضافی۳۰۰نیم فوجی کمپنیوں کی مانگ کو پیش کرنے کیلئے تیار ہے جو یکم جولائی سے شروع ہوگی اور اس سال ۳۱؍اگست تک۶۲دن تک چلے گی جبکہ۲۰۰ کمپنیوں کو اندرونی طور پر متحرک کیا جائے گا۔
پچھلے سال۳۰۰ نیم فوجی کمپنیوں کی زیادہ سے زیادہ تعداد جموں و کشمیر کو سالانہ یاترا کے لیے دی گئی تھی کیونکہ یہ یاترا پہلی بار ریاست کی خصوصی حیثیت کو ختم کرنے اور جموں و کشمیر اور لداخ کے دو مرکز کے زیر انتظام علاقوں میں تقسیم ہونے کے بعد ہو رہی تھی۔ تاہم، اس بار، تشدد سے متاثرہ منی پور میں نیم فوجی کمپنیوں کی ایک بڑی تعداد کو تعینات کیا گیا ہے اور ایسا کوئی امکان نہیں لگتا کہ انہیں اگلے ۱۵ سے ۲۰ دنوں کے اندر انہیں واپس لے لیا جائے گا۔
اس سال یاترا بھی دو ماہ سے کچھ زیادہ ہی رہنے والی ہے۔آخر کار، حکام کے مطابق، جموں و کشمیر کو ۲۵۰؍ اضافی نیم فوجی کمپنیوں کے ساتھ انتظام کرنا پڑ سکتا ہے لیکن اس ہفتے وزارت داخلہ اور جموں و کشمیر پولیس اور سول انتظامیہ کے درمیان بات چیت کے بعد حتمی فیصلہ لیا جائے گا۔
مرکزی وزیر داخلہ امت شاہ اس ماہ کے وسط کے بعد یاترا انتظامات کا جائزہ لیں گے۔ اس ماہ کے آخر میں وزیر داخلہ کے دورہ جموں و کشمیر کے امکان کو بھی رد نہیں کیا جا رہا ہے۔
اس بات پر زور دیتے ہوئے کہ پچھلے سال کے مقابلے اس سال سیکورٹی کی صورتحال بہت بہتر ہے، تاہم عہدیداروں نے کہا کہ انتظامات تقریباً پچھلے سال کی طرح ہی ہوں گے کیونکہ یاترا کی سیکورٹی کے ساتھ کوئی موقع نہیں لیا جاسکتا۔ انہوں نے مزید کہا کہ فوج جموں سرینگر اور جموں،پٹھانکوٹ کی قومی شاہراہوں کو محفوظ بنانے کے علاوہ جنوبی کشمیر کے ہمالیہ کے غار مزار اور جڑواں ٹریکس پر یاترا کے انتظامات میں بھی اہم کردار ادا کرے گی۔
جموں و کشمیر انتظامیہ اندرونی تعیناتی کے اندر سے نیم فوجی دستوں کی تقریباً ۲۰۰کمپنیوں کی تعیناتی کا انتظام کرے گی جو امن و امان اور عسکریت پسندی مخالف کارروائیوں کیلئے بنائی گئی ہیں۔ اس کے علاوہ جموں و کشمیر پولیس اور جموں کشمیر آرمڈ پولیس کو بھی یاترا ڈیوٹی کیلئے تعینات کیا جائے گا۔
پچھلے سال، یاترا ۴۴؍دن تک جاری رہی اور ملک بھر سے۶۵ء۳لاکھ یاتریوں نے غار میں بھگوان شیو کے مقدس آئس لنگم کے درشن کئے۔