دہلی کی ہوا اور پانی کو صاف کرنے کو بنائیں عوامی تحریک : کیجریوال

نئی دہلی// دہلی کے وزیر اعلی اروند کیجریوال نے لوگوں سے دارالحکومت کی ہوا اور پانی کو صاف کرنے میں حصہ لینے کی اپیل کرتے ہوئے کہا کہ ہم مل کر اسے ایک عوامی تحریک بنائیں گے ۔
مسٹر کیجریوال نے پیر کو عالمی یوم ماحولیات کے موقع پر ایک پروگرام میں کہا، ”جب بھی ہم ترقی کی بات کرتے ہیں تو یہ مانا جاتا ہے کہ ترقی کے ساتھ آلودگی بھی ہوگی۔ ترقی ہوگی تو درخت کٹیں گے ، دھول مٹی اڑے گی ، تعمیر ہوگا۔ ہم 50 سال سے ماحولیات کا عالمی دن منا رہے ہیں لیکن ان 50 سال میں پوری دنیا میں آلودگی کم ہونے کے بجائے بڑھ گئی ہے ۔ ہندوستان میں بھی اگر ہم کسی بھی شہر، قصبے یا گاؤں کو دیکھیں، ہر جگہ آلودگی بڑھی ہے ، لیکن پورے ملک میں دہلی کے اندر آلودگی میں کمی آئی ہے ۔ پچھلے آٹھ سال میں دہلی کے اندر ترقی کی رفتار کم نہیں ہوئی ہے ۔ ترقی بہت تیز رفتاری سے ہو رہی ہے ۔ا سکول، اسپتال، سڑکیں، فلائی اوور سب بن رہے ہیں لیکن آلودگی بڑھنے کے بجائے کم ہوئی ہے ۔ دہلی کے دو کروڑ عوام کے ساتھ مل کر ہم نے ترقی کی رفتار کو کم نہیں ہونے دیا اور ساتھ ہی آلودگی کو بھی کم کیا۔
انہوں نے کہا کہ 2016 کے مقابلے 2022 میں پی ایم 2.5 اور پی ایم -10 میں 30 فیصد کمی آئی ہے ۔ 2016 میں 26 دن ایسے تھے جب دہلی گیس چیمبر بن گئی تھی اور سانس لینا مشکل تھا، لیکن 2022 میں صرف چھ دن ایسے تھے جب دہلی میں آلودگی کی سطح خراب تھی۔ پوری امید ہے کہ دہلی کے لوگ مل کر ان چھ دنوں کی آلودگی کو بھی ختم کر دیں گے اور آنے والے برسوں میں ایک دن بھی ضائع نہیں ہونے دیں گے ۔