پنجاب اولمپک ایسوسی ایشن کے انتخابات اگلے چار ماہ میں کرانے کا حکم

چنڈی گڑھ// پنجاب اور ہریانہ ہائی کورٹ نے پنجاب اولمپک ایسوسی ایشن (پی او اے ) کے انتخابات اگلے چار ماہ میں کرانے کا حکم دیا ہے ۔
جسٹس ونود بھردواج کی بنچ نے پیر کو نیٹ بال پروموشن ایسوسی ایشن پنجاب کی درخواست پر سماعت کی۔ عدالت نے یہ بھی کہا ہے کہ یہ الیکشن سپریم کورٹ کی ہدایات کے مطابق ہوں گے ۔ گزشتہ تقریباً آٹھ سال سے پی او اے کے انتخابات نہیں ہوئے جس پر نیٹ بال پروموشن ایسوسی ایشن نے عدالت سے رجوع کیا تھا۔
درخواست گزار کے وکیل رتیش اگروال نے کہا کہ نیٹ بال پروموشن ایسوسی ایشن نے ہائی کورٹ میں پی او اے کی طرف سے گزشتہ آٹھ برسوں سے انتخابات نہ کرائے جانے کو لے کرعرضی دائر کی تھی۔ درخواست میں کہا گیا تھا کہ پی او اے کے عہدیداروں نے انتخابات نہ کراکر غیر قانونی طور پر اپنے عہدوں پر برقرار ہیں۔ جس کے نتیجے میں کئی کھلاڑیوں کا مستقبل تاریکی میں ڈوب گیا۔ عدالت نے پیش کیے گئے حقائق کی بنیاد پر پی او اے کو آئندہ چار ماہ میں انتخابات کرانے کا حکم دیا ہے ۔