کھیر بھوانی میلے کے کامیاب انعقاد پرشاہ کی مبارکباد

نئی دہلی// مرکزی وزیر داخلہ امت شاہ نے جموں و کشمیر کے لیفٹیننٹ گورنر منوج سنہا، مرکزی مسلح پولیس فورس، جموں و کشمیر پولیس اور مقامی انتظامیہ کو مرکز کے زیر انتظام علاقے میں مقدس کھیر بھوانی میلے کا کامیابی سے انعقاد کرنے پر مبارکباد دی ہے ۔
مسٹر شاہ نے پیر کو ٹویٹ کیا کہ کشمیر میں جیشٹھ اشٹمی پر منعقد ہونے والا کھیر بھوانی میلہ کشمیری پنڈت بھائیوں اور بہنوں کی روحانی زندگی میں ایک مقدس مقام رکھتا ہے ۔ اس سال میلے میں 25 ہزار سے زائد عقیدت مندوں نے شرکت کی۔ انہوں نے جموں و کشمیر کے لیفٹیننٹ گورنر منوج سنہا، سنٹرل آرمڈ پولیس فورسز، جموں و کشمیر پولیس اور مقامی انتظامیہ کو کھیر بھوانی میلے کے کامیاب انعقاد پر مبارکباد دی۔ انہوں نے کہا، ‘‘ماں کھیر بھوانی کی برکتیں ہمیشہ ہمارے ساتھ رہیں’’۔
کھیر بھوانی میلہ گزشتہ جمعہ کو شروع ہوا اور اتوار یعنی جیشٹھ اشٹمی کو اختتام پذیر ہوا۔
ہر سال جیشٹھ اشٹمی کے مبارک موقع پرکشمیری پنڈت ماتا راگنیا دیوی مندر میں درشن کے لیے آتے ہیں۔ اسے کھیر بھوانی مندر کے نام سے بھی جانا جاتا ہے ۔ اس سال کھیر بھوانی میلہ کشمیری پنڈتوں کے ساتھ ساتھ وادی کشمیر کے مقامی لوگوں نے بھی بڑے جوش و خروش سے منایا۔