رام بن آتشزدگی میں شاپنگ کمپلیکس اوربارہمولہ میں دو مکانات کو جزوی نقصان

جموں//
جموںکشمیر کے ضلع رام بن کے چندر کوٹ میں آتشزدگی کی ایک بھیانک واردات کے دوران تین منزلہ شاپنگ کمپلیکس کو نقصان پہنچا ہے ۔
اطلاعات کے مطابق جمعے کے روز چندر کوٹ رام بن میں شاپنگ کمپلیکس سے آگ نمودار ہوئی جس نے آناً فاناً دکان اور اس کے ساتھ موجود گودام کو لپیٹ میں لے لیا۔
فائر اینڈ ایمرجنسی اور مقامی لوگوں کی بروقت کارروائی کے نتیجے میں گر چہ آ گ پر قابو پایا گیا تاہم آتشزدگی کی اس واردات میں شاپنگ کمپلیکس کو جزوی نقصان پہنچا ہے ۔
مقامی ذرائع نے بتایا کہ کروڑوں روپیہ مالیت کی املاک راکھ کے ڈھیر میں تبدیل ہوئی۔
پولیس نے آگ لگنے کی وجوہات جاننے کی خاطر کیس درج کرکے مزید تحقیقات شروع کی ۔
اس دوران شمالی کشمیر کے ضلع بارہمولہ کے کلنترہ کریری علاقے میں جمعہ کی صبح آگ کی ایک واردات میں کم سے کم در رہائشی مکانوں کو نقصان پہنچا۔
تفصیلات کے مطابق بارہمولہ کے کلنترہ کریری علاقے میں جمعہ کی صبح ایک رہائشی مکان سے آگ نمودار ہوئی۔
مقامی لوگوں کاکہنا ہے کہ گرچہ فائر ٹنڈرس نے فوری طور کارروائی کرکے آگ کو مزید پھیلنے سے روک دیا تاہم اس دوران دو رہائشی مکانوں جن میں سے ایک یک منزلہ جبکہ دوسرا دو منزلہ مکان تھا، کو نقصان پہنچا۔
ذرائع نے بتایا کہ آگ لگنے کی وجہ معلوم کی جا رہی ہے تاہم اس واقعے میں کسی کے زخمی ہونے کی کوئی اطلاع نہیں ہے ۔