سری نگر جموں شاہراہ ٹریفک کی آمدورفت کیلئے بند : حکام

جموں//
خراب موسمی صورتحال کے بیچ سرینگر جموں شاہراہ پر متعدد مقامات پر مٹی کے تودے اور چٹانیں کھسکنے کی وجہ سے شاہراہ کو دو طرفہ ٹریفک کی آمدورفت کے لئے بند کردیا گیا ہے ۔
سرکاری ذرائع نے بتایا کہ ضلع رام بن کے کیفٹ ایریا موڑ اور دوسرے مقامات پر مٹی کے تودے اور پتھر گر نے کی وجہ سے شاہراہ کو ٹریفک کی آمدورفت کے لئے بند کردیا گیا۔انہوں نے بتایا کہ شاہراہ کو قابل آمدورفت بنانے کی خاطر اہلکاروں اور مشینری کو کام پر لگا دیا گیا ہے ۔
ٹریفک حکام نے بتایا کہ شاہراہ پر ملبہ ہٹانے کا کام جنگی بنیادوں پر شروع کیا گیا۔انہوں نے لوگوں سے اپیل کی ہے کہ وہ شاہراہ پر سفر شروع کرنے سے قبل ٹریفک حکام کے ساتھ رابط قائم کریں اور شاہراہ کی صورتحال سے آگاہی حاصل کریں۔
بتادیں کہ محکمہ موسمیات کی پیشین گوئی کے عین مطابق پچھلے۲۴گھنٹوں سے ٹنل کے آر پار رک رک کر بارشوں کا سلسلہ جاری ہے ۔