سچن ٹنڈولکر اور برائن لارا کیلئے سڈنی کرکٹ گراؤنڈ میں اعزاز کا اعلان

سڈنی//
آسٹریلیا نے عظیم کرکٹرز سچن ٹنڈولکر اور برائن لارا کے لیے سڈنی کرکٹ گراؤنڈ میں اعزاز کا اعلان کیا۔
اس حوالے سے کرکٹ آسٹریلیا نے کہا ہے کہ سڈنی کرکٹ گراؤنڈ کے دو گیٹ عظیم کرکٹرز کے ناموں سے منسوب کر دیے گئے ہیں۔
کرکٹ آسٹریلیا نے کہا کہ سچن ٹنڈولکر کی 50 ویں سالگرہ کے موقع پر اور برائن لارا کی ایس سی جی میں 277 رنز کی اننگز کو تیس سال مکمل ہونے پر اعزاز دیا گیا ہے۔
مہمان ٹیم کے کھلاڑی گراؤنڈ میں لارا ٹنڈولکر گیٹس سے داخل ہوں گے جبکہ آسٹریلیا کرکٹ ٹیم سر ڈان بریڈ مین گیٹ سے گراؤنڈمیں داخل ہوتی ہے۔
سابق بھارتی اسٹار بیٹر سچن ٹنڈولکر نے کہا ہے کہ بھارت سے باہر ایس سی جی میرا فیورٹ گراؤنڈ ہے، میری اس گراؤنڈ کے ساتھ بڑی یادیں وابستہ ہیں۔
سچن ٹنڈولکر کا کہنا ہے کہ اعزاز کی بات ہے کہ مہمان ٹیمیں میرے اور میرے قریبی دوست برائن کے نام سے منسوب گیٹ استعمال کریں گی۔
ویسٹ انڈیز کے سابق مایہ ناز بیٹر برائن لارا نے کہا ہے کہ سڈنی کرکٹ گراؤنڈ میں اعزاز دیا جانا قابل فخر ہے، میں جب آسٹریلیا آتا ہوں تو ایس سی جی ضرور آتا ہوں۔
برائن لارا کا کہنا ہے کہ ایس سی جی میرے لیے ایک خاص جگہ ہے اور اس کے ساتھ میر بڑی یادیں وابستہ ہیں۔
واضح رہے کہ اس سے قبل سر ڈان بریڈ مین، ایلن ڈیوڈسن اور آرتھر مورس کے ناموں سے گیٹ منسوب ہیں۔